بۇگىن ەلباسى نۇرسۇلتان نازاربايەۆ كاتاردىڭ جەتەكشى كورپوراسيالارى مەن قارجى ينستيتۋتتارى باسشىلارىمەن كەزدەستى. كەزدەسۋ بارىسىندا قازاق ەلى كاتارمەن ۇزاق مەرزىمدى جانە ءوزارا ءتيىمدى سەرىكتەستىكتى دامىتۋعا دايىن ەكەنى بەلگىلى بولدى. بۇل تۋرالى «قامشى» پورتالى اق وردانىڭ باسپا ءسوز قىزمەتىنە سىلتەمە جاساپ حابارلايدى.
مەملەكەت باسشىسى ن.نازاربايەۆ قازاقستان مەن كاتار اراسىنداعى ءوزارا ءتيىمدى ىنتىماقتاستىقتىڭ الەۋەتى تولىق پايدالانىلماي وتىرعانىنا توقتالا كەلىپ، ساۋدا-ەكونوميكالىق قارىم-قاتىناسىمىزدى مەيلىنشە جوعارى دەڭگەيگە جەتكىزۋ قاجەتتىگىن ايتتى.
يراننىڭ پارسى شىعاناعىنداعى باندەر ابباس پورتىنا قازاقستاننان تىكەلەي شىعاتىن تەمىرجول ەلدەرىمىز اراسىنداعى تاۋار اينالىمىنىڭ جاندانۋىنا ىقپالىن تيگىزەدى دەپ ۇمىتتەنەمىن. ورتالىق ازيادا قازاقستاننىڭ الەۋەتى زور جانە ەكونوميكالىق مۇمكىندىكتەرى جەتكىلىكتى. ءبىز ۇزاقمەرزىمدى جانە ءوزارا ءتيىمدى سەرىكتەستىكتى دامىتۋعا دايىنبىز، – دەدى نۇرسۇلتان نازاربايەۆ.
سونداي-اق ەلباسى ەلىمىزدە اۋقىمدى ينستيتۋسيونالدىق رەفورمالار، يندۋستريالىق-يننوۆاسيالىق جانە ينفراقۇرىلىمدىق دامۋعا باعىتتالعان مەملەكەتتىك باعدارلامالار جۇزەگە اسىرىلىپ جاتقانىنا توقتالدى.
