الماتى وبلىسى اقسۋ اۋدانىنا قاراستى اۋىلدىق وكرۋگتاردىڭ ءبىرىنىڭ بۋحگالتەرى 1149000 تەڭگە كولەمىندە مەملەكەت قاراجاتىن جىمقىرعانى ءۇشىن بەس جىل مەرزىمگە باس بوستاندىعىنان ايرىلدى. بۇل تۋرالى «قامشى» پورتالى الماتى وبلىستىق سوتىنىڭ باسپا ءسوز قىزمەتىنە سىلتەمە جاساپ حابارلايدى.
سوت پروسەسى بارىسىندا «ەسەبولات اۋىلدىق وكرۋگى» مەملەكەتتىك مەكەمەسىنىڭ بۋحگالتەرى مەملەكەتتىك قىزمەتتەردى جۇزەگە اسىرۋشى لاۋازىمدى تۇلعا بولا تۇرا اعىمداعى جىلدىڭ ناۋرىز-مامىر ايلارى ارالىعىندا بيۋدجەت قاراجاتىن ءوزىنىڭ ەسەپشوتىنا ەڭبەكاقى تۇرىندە زاڭسىز اۋدارىپ كەلگەنى انىقتالدى. مەملەكەتكە كەلتىرىلگەن شىعىننىڭ جالپى كولەمى 1149000 تەڭگەنى قۇراعان. بۋحگالتەر ق ر قك-نىڭ «مەملەكەتتىك قىزمەتتەردى ورىنداۋعا وكىلەتتى تۇلعانىڭ سەنىپ تاپسىرىلعان مۇلىكتى اسا ءىرى كولەمدە يەمدەنۋى» بابى بويىنشا ايىپتى دەپ تانىلىپ، بەس جىل مەرزىمگە باس بوستاندىعىنان جانە ءومىر بويى مەملەكەتتىك قىزمەتكە ورنالاسۋ قۇقىعىنان ايرىلدى.
