بۇگىن الماتىداعى اباي اتىنداعى وپەرا جانە بالەت تەاترىندا «التىن جۇرەك» قايىرىمدىلىق سىيلىعىمەن سالتاناتتى تۇردە ماراپاتتاۋ ءراسىمى وتەدى. بۇل تۋرالى «قامشى پورتالى» «باۋىرجان» قايىرىمدىلىق قورىنىڭ باسپا ءسوز قىزمەتىنە سىلتەمە جاساپ حابارلايدى.

قايىرىمدىلىق سىيلىعىنىڭ ماراپاتتاۋ ءراسىمى الماتى قالاسىنىڭ اكىمى باۋىرجان بايبەكتىڭ قاتىسۋىمەن وتەدى.

شارانى «باۋىرجان» قايىرىمدىلىق قورى «نۇر وتان» پارتياسىنىڭ قولداۋمەن ۇيىمداستىرادى. بۇل كەشكە  «التىن قىران» كومپانيالار توبى مەن «ForteBank» اق-ى ارىپتەس بولىپ وتىر.

بيىلعى جىلى «دوم» قايىرىمدىلىق قورىنىڭ ۇسىنۋىمەن قازاقستان پرەزيدەنتى نۇرسۇلتان نازاربايەۆ سىيلىقتىڭ «جىلدىڭ قايىرىمدى ادامى» اتالىمى بويىنشا قاتىسۋدا.  وزگە دە اتالىم يەلەرى قاتارىندا العاشقى بالالار ءحوسپيسىن ۇيىمداستىرۋشى ناگيما پلوحيح، كتك تەلەارناسىنىڭ «دوروگا دوموي» جوباسى،  Samsung Central Asia كومپانياسى،  11 بالانىڭ اكەسى مۇرات قابىلبايەۆ، «رودينا» اگروفيرماسى، قازاقستانداعى العاشقى Training Cafe ۇيىمداستىرۋشىسى اننا قۇدياروۆا جانە دە شەتەلدىك ازامات، تاراز قالاسىندا جەتىمدەرگە باسپانا اشقان ۆيكتوريا شاربونە، تاعى دا باسقالارى بار.

كەش Turkvision-2014 بايقاۋىنىڭ جەڭىمپازى جانار دوعالوۆانىڭ اسەم انىمەن سالتاناتتى تۇردە  اشىلىپ، قازاقستاندىق ەسترادا جۇلدىزدارىنىڭ قاتىسۋىمەن وتەدى دەپ جوسپارلانۋدا.  كەش قوناقتارى قاتارىندا دومبىراشى اسىلبەك ەڭسەپوۆ، ق ر حالىق ءارتىسى نۇرجامال ۇسەنبايەۆا، سكريپكاشى ءجاميلا سەركەبايەۆا، MEZZO توبى جانە باسقالار ونەر كورسەتەدى.  

سونىمەن قاتار، كەلۋشىلەرگە ارنايى «100 قايىرىمدى ءىس» اتتى فوتوكورمەسى ۇيىمداستىرىلادى.

 «التىن جۇرەك» - بۇل ورتالىق ازياداعى جانە قازاقستاندىق قايىرىمدىلىق سالاسىنداعى العاشقى جانە قازىرگى بىردەن-بىر بەدەلدى سىيلىق بولىپ تابىلادى. سىيلىق ۇيىمداستىرۋشىلارى «باۋىرجان» قايىرىمدىلىق قورى جىل بويىنا رەسپۋبليكا بويىنشا «قازاقستاننىڭ التىن جۇرەگى»  اتانۋعا لايىق قايىرىمدى جانداردى ىزدەستىردى.           

سىيلىقتىڭ ۇيىمداستىرۋ كوميتەتىنىڭ بەرگەن مالىمەتتەرىنە سۇيەنسەك،  2015 جىلى رەسپۋبليكادا  جالپى 12 ميلليارد تەڭگە كولەمىندە قايىرىمدىلىق  شاراسى جۇزەگە اسىرىلعان. قازاقستانداعى  قايىرىمدى ادامدار مەن ەرىكتىلەردىڭ كومەگىمەن 6 سپورتتىق مەكتەپ، 5 بالاباقشا سالىنىپ، 5 جالپى ءبىلىم بەرەتىن مەكتەپكە، 4  مۇگەدەك بالالارعا ارنالعان بالاباقشاعا، جاعدايى تومەن وتباسىنىڭ بالالارىنا ارنالعان 2 لاگەرعا  جوندەۋ جۇمىستارى جۇرگىزىلدى، 8 كومپيۋتەرلىك سىنىپ پەن 5 ەمحانا قۇرال-جابدىقتار مەن قامتىلدى، جاعدايى ناشار وتباسىنان شىققان 1000 بالا وقۋعا دايىندالدى، ۇوس 25 ارداگەرىنىڭ پاتەرلەرىنە جوندەۋ جۇمىستارى جۇرگىزىلدى جانە الماتىنىڭ سەل بولعان ايماقتارىنا 7 كۇن بويىنا اسحانالاردا ەرىكتىلەر 5 مىڭداي ادامدى كۇنىنە ەكى ۋاقىت تاماقتاندىردى.