جاڭا تۋريستىك ماۋسىم قارساڭىندا الاكول جاعالاۋىندا دەمالۋشىلارعا قولايلى جاعداي جاساۋعا باعىتتالعان ينفراقۇرىلىمدىق جۇمىستار تولىق اياقتالدى.

بيىل جاعالاۋ اۋماعىنا 470 كونتەينەر، 50 تورلى كونتەينەر، 100 قوقىس جاشىگى جانە 100 پلاستيك كونتەينەر ورناتىلدى. سونداي-اق تۋريستەردىڭ جايلىلىعى ءۇشىن 44 كيىم اۋىستىرۋ كابيناسى مەن 24 ءمودۋلدى اجەتحانا پايدالانۋعا بەرىلدى.

قوسىمشا رەزەرۆ رەتىندە 45 بيودارەتحانا دايىندالدى. ولار دەمالۋشىلار سانىنا بايلانىستى جاعالاۋدىڭ ەڭ كوپ كەلەتىن اۋماقتارىنا كەزەڭ-كەزەڭىمەن ورنالاستىرىلادى.

قاۋىپسىزدىك شارالارى دا كۇشەيتىلدى. جاعالاۋ بويىنا 40 قۇتقارۋ مۇناراسى قويىلىپ، سۋداعى قاۋىپسىزدىكتى قامتاماسىز ەتۋ ءۇشىن 13 شاقىرىمدىق قالقىما بەلگى جەلىسى تارتىلدى جانە 7 پيرس جابدىقتالدى.

تۋريستەردىڭ اۋماقتا ەركىن ءجۇرىپ-تۇرۋى ماقساتىندا 14 باعىتتاۋشى كورسەتكىش پەن 38 اقپاراتتىق تاقتا ورناتىلدى. بۇل دەمالۋشىلارعا قاجەتتى نىسانداردى وڭاي تابۋعا جانە قاۋىپسىزدىك تالاپتارىمەن جەدەل تانىسۋعا مۇمكىندىك بەرەدى.

ينفراقۇرىلىم نىساندارىن ورنالاستىرۋ جانە ورناتۋ بويىنشا جوسپارلانعان بارلىق جۇمىس تولىق اياقتالدى. قازىرگى ۋاقىتتا الاكول جاعالاۋى شومىلۋ ماۋسىمىن قابىلداۋعا تولىق دايىن.