قازىرگى الەمدە، جاھاندانۋ داۋىرىندە جاستار اقپاراتتىڭ كوپ بولىگىن الەۋمەتتىك جەلىلەر مەن ينتەرنەت ارقىلى الادى. وكىنىشكە وراي، كەيبىر تەرىس نيەتتى توپتار جاستاردى راديكالدى يدەيالارعا تارتۋعا تىرىسادى. ولار ءدىندى بۇرمالاپ تۇسىندىرەدى جانە قوعامدا الاۋىزدىق تۋدىرۋعا تىرىسادى. مۇنداي قاۋىپتەردىڭ الدىن الۋ ءۇشىن جاستاردىڭ ءدىني ساۋاتتىلىعىن ارتتىرۋ، ءداستۇرلى رۋحاني قۇندىلىقتاردى ناسيحاتتاۋ جانە سىني ويلاۋدى دامىتۋ وتە ماڭىزدى.
وسىعان بايلانىستى ءبىزدىڭ جاستار تولەرانتتىلىق پەن كونفەسسياارالىق كەلىسىم قازىرگى بەيبىت قوعامنىڭ باستى قۇندىلىقتارىنىڭ ءبىرى ەكەنىن ءتۇسىنۋى كەرەك. الەمدە ءارتۇرلى ۇلتتار مەن دىندەردىڭ وكىلدەرى تۇرادى. ولاردىڭ ءوزارا قۇرمەتى، تۇسىنىستىگى مەن كەلىسىمى مەملەكەتتىڭ تۇراقتىلىعى مەن قوعامنىڭ دامۋىنا تىكەلەي اسەر ەتەدى. سوندىقتان تولەرانتتىلىق مادەنيەتىن قالىپتاستىرۋ جانە كونفەسسياارالىق كەلىسىمدى نىعايتۋ ءاربىر ازاماتتىڭ ماڭىزدى مىندەتى بولىپ سانالادى.
تولەرانتتىلىق – بۇل باسقالاردىڭ پىكىرىنە، مادەنيەتىنە، تىلىنە جانە ءدىني سەنىمدەرىنە قۇرمەتپەن قاراۋ. بۇل ءسىزدىڭ دىنىڭىزدەن نەمەسە پرينسيپتەرىڭىزدەن باس تارتۋدى بىلدىرمەيدى، كەرىسىنشە باسقالاردىڭ سەنىمى مەن پىكىرىنە قۇرمەت كورسەتۋدى بىلدىرەدى. تولەرانتتى قوعامدا ادامدار ءبىر-بىرىن تومەندەتپەيدى جانە ورتاق قۇندىلىقتاردى جوعارى باعالايدى. مۇنداي قوعامدا تۇراقتىلىق، ءوزارا سەنىم جانە ازاماتتىق بىرلىك نىعايادى.
قازاقستان – كوپتەگەن ەتنوستار مەن ءتۇرلى ءدىني بىرلەستىكتەردىڭ وكىلدەرى كەلىسىمدە ءومىر سۇرەتىن مەملەكەت. ءبىزدىڭ ەلدە زاڭ يسلام، پراۆوسلاۆيە، كاتوليسيزم، پروتەستانتتىق اعىمدار، يۋدايزم، بۋدديزم جانە باسقا دا كونفەسسيالاردىڭ قىزمەتىنە جاعداي جاسادى. مەملەكەت ءاربىر ازاماتقا ار-وجدان مەن ءدىني سەنىم بوستاندىعىنا كەپىلدىك بەرەدى. سونىمەن قاتار، ءدىني كەلىسپەۋشىلىكتىڭ الدىن الۋ جانە قوعامدىق كەلىسىمدى ساقتاۋ مەملەكەتتىك ساياساتتىڭ ماڭىزدى باعىتتارى بولىپ تابىلادى.
كونفەسسياارالىق كەلىسىم – بۇل ءوزارا قۇرمەت پەن تۇسىنىستىككە نەگىزدەلگەن ءارتۇرلى ءدىني بىرلەستىكتەردىڭ ءومىرى. مۇنداي كەلىسىم قوعامدا ءدىني نەگىزدە جانجالداردىڭ تۋىنداۋىنا جول بەرمەيدى. ءاربىر ءدىن ادامدى جاقسىلىق، مەيىرىمدىلىك، ادىلدىك پەن ادامگەرشىلىككە شاقىرادى. سوندىقتان ءارتۇرلى كونفەسسيالار وكىلدەرىنىڭ ورتاق ماقساتتار بويىنشا بىرلەسكەن جۇمىسى قوعامنىڭ دامۋىنا وڭ اسەر ەتەدى.قازاقستاندا كونفەسسياارالىق كەلىسىمدى نىعايتۋ بويىنشا ۇلكەن جۇمىس جۇرگىزىلۋدە. ءتۇرلى دەڭگەيدەگى كەزدەسۋلەر، دوڭگەلەك ۇستەلدەر، عىلىمي كونفەرەنسيالار مەن اعارتۋشىلىق ءىس-شارالار ۇيىمداستىرىلادى. بۇل شارالار ءارتۇرلى ءدىني بىرلەستىكتەر اراسىنداعى ءوزارا سەنىمدىلىكتى ارتتىرادى جانە قوعامداعى كەلىسىمدى ساقتاۋعا ىقپال ەتەدى. سونداي-اق، ءبىلىم بەرۋ مەكەمەلەرىندە تولەرانتتىلىقتى، ءپاتريوتيزمدى جانە ادامگەرشىلىك قۇندىلىقتاردى ناسيحاتتاۋعا ەرەكشە كوڭىل بولىنەدى.
تولەرانتتىق پەن كونفەسسياارالىق كەلىسىم ءار ازاماتتىڭ كۇندەلىكتى ومىرىنەن باستالادى. ادام باسقا ادامداردىڭ پىكىرى مەن سەنىمىنە قۇرمەتپەن قاراپ، ارازدىقتى ەمەس، كەلىسىم مەن بىرلىكتى ناسيحاتتاۋى كەرەك. ءوزارا سىيلاستىق، جاۋاپكەرشىلىك جانە زاڭدى قۇرمەتتەۋ قوعامداعى تۇراقتىلىقتىڭ بەرىك نەگىزى بولىپ تابىلادى.قورىتىندىلاي كەلە، تولەرانتتىلىق پەن كونفەسسياارالىق كەلىسىم — قازاقستاننىڭ باستى جەتىستىكتەرىنىڭ ءبىرى. ولاردى ساقتاۋ جانە نىعايتۋ — مەملەكەت پەن قوعامنىڭ عانا ەمەس، ءاربىر ازاماتتىڭ ورتاق مىندەتى. بىرلىك پەن كەلىسىم ۇستەمدىك ەتەتىن ەلدە عانا تۇراقتى دامۋ، بەيبىت ءومىر جانە جارقىن بولاشاق مۇمكىن. سوندىقتان تولەرانتتىلىق مادەنيەتىن قالىپتاستىرۋ جانە كونفەسسياارالىق كەلىسىمدى ءنىعايتۋ-بىزدىڭ ورتاق ماقساتىمىز.
