سپورتتىڭ جولدان قوسىلا كەتۋگە كەلمەيتىن  ءبىر سالاسى – كۇرەس. باپ پەن باقتان باسقا، اتانىڭ قانى، انانىڭ ءسۇتى ارقىلى دارىعان اقىل-سانا، ءىرى دەنەلى بولۋدىڭ  ماڭىزى جوعارى. وسى سالادا جاۋىرىنى جەرگە تيمەي جۇرگەن ءبىر بالۋانىمىز - قيسا قابي ۇلى. قيسا  اتاجۇرتقا كورشى جۇڭگو ەلىنەن كەلگەن قانداسىمىز. تۋىلعاندا 6،5 كگ بولىپ ەل-جۇرتتى ەلەڭ ەتكىزگەن. ول 1988 جىل بولاتىن.وعان دەيىن اتا-اناسى 13 جىل بويى ءبىر پەرزەنتكە زار بولىپ كەلگەن. ءسويتىپ، جارىق دۇنيەگە كەلە سالىسىمەن نازارعا ىلىككەن قيسانى باپكەرلەر بالا كۇنىندە اتا-اناسىنان قولقالاپ الادى، قىتايدىڭ قيىر شەتىندەگى لانجۋ قالاسىنا وقۋعا جىبەرەدى. وسىلاي 13 جاسقا تولماستان بەلدەسۋدىڭ قىر-سىرىن مەڭگەرۋگە كىرىسكەن  قيسا 2003 جىلدان بەرى بوز كىلەمنىڭ ۇستىندە. العاشقى جەڭىستىڭ اسقاق سەزىمىن اۋىلدان باستاعان بالۋان  4 جىلدا ءبىر رەت وتەتىن قىتايدىڭ ىشكى بىرىنشىلىگىندە 96 كگ سالماقتا توپ جاردى. قىتايدىڭ ۇلتتىق قۇراماسىنىڭ قاتارىندا 3 جىل ونەر كورسەتتى. شىڭجاڭ وڭىرىندە وعان دەيىن ەشكىم وسى مارەگە جەتپەگەن ەكەن. وسىلاي قارسىلاستارىن قوعاداي جاپىرىپ جۇرگەندە الماتىدا وتكەن كەزەكتى جارىستا قارسىلاسىنىڭ وقىس قيمىلىنان اياعىنىڭ  ءسىڭىرى ءۇزىلىپ، توعىز اي  بالداققا سۇيەنىپ قالادى. ءسويتىپ، بۇرىندارى ءوزى ويقاستاپ جۇرگەن شارشى الاڭدى سىرتتاي تاماشالاۋعا تۋرا كەلەدى.

اقىرى دەنساۋلىعى قالپىنا كەلگەن سوڭ ەلگە كەلۋدى ويلايدى. قازاق ەلىنىڭ گۇرزى جۇدىرىقتى وعلانى قانات يسلامنىڭ  شاقىرۋى قامشى بولىپ، اتا-باباسى كۇل توككەن كيەلى مەكەنگە تارتىپ بەرەدى. بۇگىندە الماتى وبلىسى بالۋاندارىنىڭ ساپىندا ەركىن كۇرەس پەن قازاقشا كۇرەستەن ونەر كورسەتىپ ءجۇر. سالماعى 140 كگ، بويى 190 سم. اڭگىمە بارىسىندا قيسا كاسىپكەر اعالارى  باۋىرجان وسپانوۆ پەن ارمان وڭعاربەكتىڭ قارجىلىق جاعىنان كومەك قولىن سوزعانىن ايتتى. ەركىن كۇرەستەن باپكەرى مالىك نادىربەك ۇلى، قازاقشا كۇرەستەن ايدىن سماعۇلوۆتان ءتالىم الادى.

قازاق ەلىنە كەلگەلى دە قيسا  جەڭىستەن قۇرالاقان ەمەس، كوپتەگەن جارىستاردا توپ جارىپ ءجۇر. الداعى ۋاقىتتا اتاجۇرتىنا اق ءۇمىتىن ۇكىلەپ كەلگەن بالۋاننىڭ باستى ماقساتى قازاقتىڭ كوك تۋىن جەلبىرەتۋ. قازىرگە ناقتى جوسپارلارىنىڭ قاتارىندا تورتكىل دۇنيەنىڭ كوز تىگىپ وتىرعان ريو-دە-جانەيرو وليپياداسى بار. «مەنىڭ ەندىگى مۇراتىم - قۇدايدىڭ بەرگەن كۇش-قۋاتىن تۋعان ۇلتىمنىڭ، قازاق مەملەكەتىنىڭ جولىندا جۇمساۋ!»،- دەيدى بالۋان.