قازاقستاندا ازىق-تۇلىكتىڭ قۇنى وسپەس ءۇشىن بيىل ەل ۇكىمەتى الەۋمەتتىك ماڭىزى بار تاۋارلاردىڭ شەكتى باعاسىن بەكىتەدى، دەپ حابارلايدى Tengrinews.kz ءتىلشىسى پرەمەر-مينيستر سەرىك احمەتوۆكە سىلتەمە جاساپ.
"سونداي-اق جانار-جاعار ماي باعاسى رەتتەلىپ، قاتاڭ باقىلاناتىن بولادى"، - دەدى بۇگىن س.احمەتوۆ پرەزيدەنت ن.نازاربايەۆتىڭ قاتىسۋىمەن اقوردادا ءوتىپ جاتقان ۇكىمەتتىڭ كەڭەيتىلگەن ماجىلىسىندە. ۇكىمەت باسشىسى اتاپ كورسەتكەندەي، بۇگىندە باعا سالاسىنداعى قيىنشىلىقتاردىڭ باسىم بولىگى سىرتتان كەلەتىن تاۋارلارمەن بايلانىستى بولىپ تۇر. سەبەبى قاجەتتى قۇرىلعىلار مەن ماتەريالدار شەتەلدىك ۆاليۋتاعا ساتىپ الىنادى. ءبىراق پرەمەر وسى سالاداعى جاعدايدى دا جان-جاقتى زەردەلەپ، ءتيىستى شارالاردى قولعا الۋدى كوزدەيدى.
ايتا كەتكەن ءجون، بۇگىندە ەلىمىزدەگى ازىق-تۇلىكتىڭ باعاسى تۇراقتاندىرۋ قورلارىنداعى رەزەرۆكە تىكەلەي بايلانىستى. ءدال ءقازىر وندا بارلىعى 43 مىڭ توننا تاۋار بار. دەگەنمەن، ونىڭ دا باعاسى سىرتتان كەلەتىن ازىق-تۇلىككە تاۋەلدى بولىپ تۇر. بۇعان دەيىن اۋىل شارۋاشىلىعى ءمينيسترى اسىلجان مامىتبەكوۆ اتاپ كورسەتكەندەي، تەڭگە باعامىنىڭ وزگەرۋى سىرتقى تاۋاردىڭ قىمباتتاۋىنا سەبەپ بولادى. "ول تۇسىنىكتى ءجايت. وعان قارسى اكىمشىلىك شارانى قولدانۋ قيىن. سەبەبى ونى مۇلدەم اكەلمەي قويۋى مۇمكىن. سونىڭ سالدارىنان تاپشىلىق بولىپ، ىشكى تاۋارلاردىڭ باعاسى دا كوتەرىلەدى"، - دەيدى مينيستر ا.مامىتبەكوۆ. سوندىقتان بۇگىنگى تۇراقتاندىرۋ قورلارىندا بار تاۋاردى ۇقساتا بىلگەن ءجون. ءبىر وكىنىشتىسى، كەيبىر قورلاردا "رەزەرۆ" تاۋارلار مۇلدەم جوق. "ولارعا بولىنگەن اقشا دەپوزيتتەردە جاتۋى ىقتيمال"، - دەپ اتاپ كورسەتكەن بولاتىن مينيستر. دەمەك، كەيبىر ايماقتاردا (مينيستر ناقتى ايتقان جوق - اۆت.) قىمباتشىلىق بولۋى ابدەن مۇمكىن. ءبىراق ناننىڭ باعاسى كوتەرىلمەۋى ءتيىس. بۇل تۋرالى الاش ايناسى گازەتى دە جازعان.
ارمان اسقاروۆ
پىكىر قالدىرۋ