الماتىداعى ترامۆاي دەپوسىنىڭ جۇمىسى ۋاقىتشا توقتاتىلادى. بۇل تۋرالى «قامشى» پورتالى قالالىق اكىمدىك باسپا ءسوز قىزمەتىنە سىلتەمە جاساپ حابارلايدى.
الماتى اكىمى ترامۆاي دەپوسىنا بارىپ، ونىڭ جۇمىسىمەن تانىسقاننان سوڭ وسىنداي شەشىمگە كەلگەن. اكىم دەپو باسشىلىعىنا قوعامدىق كولىك دەپوسىنىڭ جۇمىسىن رەتتەۋ تۋرالى ءبىرقاتار تاپسىرمالار بەرىپ، ترامۆايلاردىڭ وسى كۇيىندە قىزمەت كورسەتۋى مۇمكىن ەمەس ەكەنىن ايتقان.
دەپو جۇمىسشىلارى ەش قىسقارتىلمايتىنى، ولاردى ەڭبەكاقىلارىن ساقتاي وتىرىپ، باسقا جۇمىسقا اۋىستىرىلاتىنى ايتىلعان حابارلامادا. قالانىڭ تاريحي كەلبەتىن ساقتاپ قالۋ ماقساتىندا قالادا تۋريستىك ترامۆايلار قاتىنايتىن بولادى.
ەستەرىڭىزگە سالا كەتسەك، بيىل قىركۇيەك، قازان ايلارىندا الماتىدا ترامۆايدىڭ قاتىسۋىمەن ەكى ءىرى جول اپاتى ورىن العان بولاتىن. جىل باسىنان بەرى 43 رەت ترامۆايلاردىڭ رەلستەن شىعىپ كەتۋ وقيعاسى تىركەلگەن.
