گەرمانيانىڭ استاناسىندا سالماعى 250 كگ بولاتىن ۇلى وتان سوعىسى كەزىندەگى امەريكالىق بومبا تابىلدى. سونىڭ سالدارىنان قالاداعى 12 مىڭنان استام ادام ءقاۋىپسىز جەرلەرگە كوشىرىلدى. بۇل تۋرالى «قامشى» پورتالى تاسس-قا سىلتەمە جاساپ حابارلايدى.

بەرليندە ەۆرەي مۋزەيىنىڭ جانىنان ەكىنشى دۇنيەجۇزىلىك سوعىستا قولدانىلعان اۆيابومبا تابىلۋىنا بايلانىستى، 12 مىڭنان استام ادام ءقاۋىپسىز جەرلەرگە كوشىرىلدى. Rundfunk Berlin-Brandenburg راديوسىنىڭ ايتۋىنشا، امەريكالىق بومبانىڭ سالماعى 250 كگ قۇرايدى. ول بۇرىنعى گۇل ساتاتىن بازاردىڭ ورنىنان تابىلعان. سوندىقتان بۇل ماڭعا جاقىن جەرلەردە جۇرۋگە تيىم سالىنىپ، قوعامدىق كولىكتەر اينالما جولدار ارقىلى وتۋدە.

ايتا كەتەيىك، وتكەن جەكسەنبىدە وسى ماڭعا جاقىن جەردە باسقا بومبا تابىلدى. دەمالىس كۇنى دە 12 مىڭنان استام تۇرعىن ءقاۋىپسىز جەرگە كوشىرىلگەن بولاتىن.

ۇلى وتان سوعىسى كەزىندە گەرمانيا ايماعىندا، اتاپ ايتساق، بەرلينگە 68 مىڭنان توننادان اسا، گامبۋرگكە 45 مىڭ توننا، ال رۋرسكيي وبلىسىنا 162 مىڭ توننادان استام بومبا تاستالعان.