قۇمار ويىندارى – اداممەن بىرگە جاساپ كەلە جاتقان جات قىلىقتىڭ ءبىرى. كىسى بويىنداعى قۇمارلىق سەزىمى مەن وڭاي ولجا تابامىن دەگەن سوقىر دامە تالاي جەردە سان سوقتىرىپ، بارماق تىستەتىپ ءجۇر. ادام بويىنداعى وسى قاسيەتتەردى تابىس كوزىنە اينالدىرىپ، قۇمارحانالاردى كاسىپ ەتكەن ۇيىمدار، قالالار، تۇتاستاي ەلدەر قانشاما؟!
قازاقستان دا تاۋەلسىزدىكتىڭ العاشقى جىلدارىندا ەندەپ كىرگەن وسى قۇمار بيزنەسىنىڭ ورداسى كازينولاردان كەندە ەمەس ەدى. وسىدان 7-8 جىلداي ۋاقىت بۇرىن جوعارى دەڭگەيدەگى بيلىك كۇشتەرىنىڭ ارالاسۋىمەن كازينولاردىڭ قىزمەتى زاڭسىز دەپ تابىلىپ، ەلدى-مەكەندەردەگى كوپتەگەن ويىنحانالار جابىلدى. رەسپۋبليكا بويىنشا قاپشاعاي مەن ششۋچينسك قالالارى عانا ويىنحانالاردىڭ قىزمەتى رۇقسات ەتىلگەن ەلدى-مەكەن بولىپ تانىلدى. وسىمەن ماسەلە شەشىلدى دەپ ويلادىق. جوق، ولاي ەمەس ەكەن.
شامدارى جارقىراپ، قىزىلدى-جاسىلدى جارناماسى سونادايدان كوز تارتقان كازينولار قۇرىعانمەن ونىڭ ورنىن بۇگىندە ورناتۋى كوپ قاراجاتتى قاجەت ەتپەيتىن، الايدا، قۇمارپازدىڭ قالتاسىن قاعۋدا كازينودان كەم تۇسپەيتىن ويىن اۆتوماتتارى باستى. ءقازىر، ءار ايالدامادان، دۇكەندەر مەن بازارلاردىڭ قاي-قايسىسىنان وسىنداي ويىن اۆتوماتتارىن كورۋگە بولادى. وڭىرلەردە تەز تاراپ، ۇلكەن-كىشى، ەركەك-ۇرعاشى دەمەي بارلىق ەلدىڭ تاۋەلدىلىگىن تۋعىزىپ وتىرعان سول اۆتوماتتار، ءتىپتى، كازينودان دا ءقاۋىپتى مە دەپ تە قالاسىز. وعان سەبەپ تە جوق ەمەس.
بىرىنشىدەن، بۇل ويىن بيزنەسى زاڭعا قايشى ەمەس. ياعني، كاسىپكەرلەر ارباۋ اپپاراتتارىن كەز-كەلگەن جەرگە كەز-كەلگەن ۋاقىتتا ورناتىپ، شارۋاسىن دوڭگەلەتىپ جۇرە بەرەدى. ونى كۇندە كورىپ ءجۇرمىز. ويىن اپپاراتتارى ازىق-تۇلىك دۇكەنىنەن باستاپ كولىك بازارىنا دەيىن سامساپ تۇر. بۇلاردى كەي كاسىپكەرلەر، ءتىپتى ويىن اۆتوماتى ەمەس، لوتورەيا قۇرىلعىلارى دەپ اتاپ ءجۇر.
ەكىنشى ەرەكشەلىگى – قول جەتىمدىلىگى. ول اپپاراتتارمەن ويناۋ ءۇشىن ارنايى ءبىر جەرگە بارۋدىڭ، اپپارات قىزمەتىن پايدالانعانىڭ ءۇشىن قوسىمشا اقشا تولەۋدىڭ قاجەتى جوق. ويىنعا تىگەتىن سومانىڭ دا قوماقتى بولۋى شارت ەمەس. زامانداستارىمىز ويناپ جۇرگەن اپپاراتتار 500 تەڭگەدەن باستاپ قابىلداي بەرەدى. ەسەسىنە، ۇتىلاتىن اقشادا ەسەپ جوق. ءوز تاپقان-تايانعانىن بەرىپ قانا قويماي، ەلدەن اقشا الىپ سالىپ جۇرگەندەر قانشاما؟ وسى تەمىردىڭ ق ۇلى بولعان كوپ جىگىتتەر بۇگىندە جاقىن-جۋىققا تۇگەل قارىزدانىپ بىتكەنىن ايتادى.
ۇشىنشىدەن، ارينە، تاۋەلدىلىك ماسەلەسى. كەز-كەلگەن ويىن ادام بويىنداعى قىزىعۋشىلىقتى وياتاتىن قۇبىلىس بولسا، بۇل اپپاراتتار قۇمارىڭدى قوزدىرادى. قىزىلدى-جاسىلدى، ءىرىلى-ۇساقتى ويىن فيگۋرالارى كوزدىڭ جاۋىن الىپ، ساناعا شايتاني وي سالادى. بۇگىندە وسى اۆتوماتتارعا بايلانىپ قالعان ادامدار قانشاما. جالپى ويىن دەگەن دۇنيە ادام بالاسى جيىرما جاستان اسقان سوڭ قىزىعى باسىلاتىن بولسا، مىنا اپپاراتتارداعى ويىندار جاس تالعامايدى. مەكتەپ جاسىنداعى بالا دا، ستۋدەنت تە، قاتىن-بالاسى بار سوقتالداي ازاماتتار دا بار تاپقانىن اپپاراتقا سالىپ تۇرعانىن كۇندە كورەمىز.
مۇنداي اپپاراتتارعا تاۋەلدىلىكتىڭ پايدا بولۋ، ودان قۇتىلۋ جولدارىن پسيحولوگ ماماندار ايتا جاتار. ءبىراق، قوعامعا ءقاۋىپ توندىرەتىن دەرت بولىپ وتىرعان بۇل «ويىنشىقتاردى» ورتامىزدان الاستاتۋدىڭ زاڭدى تەتىكتەرىن قاراستىراتىن كەز كەلگەن سياقتى.
