وڭتۇستىك وڭىرلەردى ارالاۋعا كىرىسكەن ەلباسى وڭتۇستىك قازاقستان وبلىسىنداعى جۇمىس ساپارى بارىسىندا «مەرەيلى ماقساتىمىز – ماڭگىلىك ەل!» سالتاناتتى ءىس-شاراسىنا قاتىستى. تويعا جينالعان حالىقتى ۇلتىمىز ءۇشىن ۇلىق مەرەكە سانالاتىن ءاز ناۋرىزبەن قۇتتىقتاعان نۇرسۇلتان ءابىش ۇلى: «سىزدەردىڭ وڭىردە مەرەكەلىك شارالار نەگىزگى مەيرامعا دەيىن توعىز كۇن بۇرىن باستالادى. ءار كۇنگە ءمان-ماڭىز بەرۋ جانە ونى ىزگى ىستەرگە ارناۋ جاقسى باستاما. سونىڭ ارقاسىندا ناۋرىز ناعىز ىزگىلىكتىڭ مەرەكەسىنە اينالىپ كەلەدى. بۇل باسقا وڭىرلەرگە ۇلگى بولارلىق باستاما»، – دەدى.
ەلىمىزدىڭ ەرتەڭى – جاستارعا مەملەكەت تاراپىنان ءبىلىم بەرۋ، دەنساۋلىق ساقتاۋ، جاستار ساياساتىنا ەرەكشە كوڭىل ءبولىنىپ وتىرعانىن ەسكەرتكەن پرەزيدەنت جيىلعان جاستارعا اعالىق اقىلىن ايتتى: «بۇگىن وسىندا كوپتەگەن جاستار وتىر. ءبىز جاستارىمىزدىڭ جاقسى ءبىلىم الۋى ءۇشىن جاڭا بالاباقشالار، مەكتەپتەر، ۋنيۆەرسيتەتتەر سالۋدامىز. وبلىستا «بالاپان» باعدارلاماسى اياسىندا مەكتەپكە دەيىنگى بىلىممەن بالالاردىڭ 70 پايىزى قامتىلعان. سونىمەن قاتار، انا مەن بالا ءولىمىنىڭ دەڭگەيى 20 پايىزعا تومەندەدى. ءار وبلىستا مەديسينانى دامىتۋ ماسەلەلەرىنە زور كوڭىل ءبولۋدىڭ ارقاسىندا قازاقستاندىقتاردىڭ ورتاشا ءومىر جاسىنىڭ ۇزاقتىعى 70-كە جەتتى. بۇل ءبىزدىڭ ەلىمىزدىڭ زور تابىسى ءارى دامۋىنىڭ كورسەتكىشى دەپ ەسەپتەيمىن».
مەرەكەلىك جيىن بارىسىندا الەمدىك ەكونوميكالىق، ساياسي جانە ديپلوماتيالىق داعدارىستاردىڭ بەلەڭ العانىنا قاراماستان، قازاق ەلى جۇيەلى دە تۇراقتى دامىپ كەلە جاتقانىن جانە بۇعان قازاقستانداعى ايماقتاردىڭ الەۋمەتتىك-ەكونوميكالىق كورسەتكىشتەرى دالەل بولا الاتىنىن ايتقان ەلباسى: «وڭتۇستىك قازاقستان وبلىسىندا بۇكىل ەل حالقىنىڭ 17 پايىزى تۇرادى. ءوڭىر اۋماعى ارقىلى ءىرى تەمىرجول ماگيسترالى وتەدى، «باتىس ەۋروپا – باتىس جۇڭگو» حالىقارالىق ترانزيتتىك كولىك ءدالىزى سالىندى. اۋەجاي قايتا جوندەلۋدە. وسى جىلدار ىشىندە وبلىس ۋران ءوندىرىسىنىڭ الەمدىك ورتالىعىنا اينالدى. بۇگىندە ءوڭىردىڭ كەنىشتەرى جاھاندىق ۋران ءوندىرىسىنىڭ 35 پايىزىن قامتاماسىز ەتىپ، ءبىرىنشى ورىندى يەلەنىپ وتىر، – دەدى.
جيىن سوڭىندا «نۇر وتان» پارتياسىنىڭ تاياۋدا وتكەن XVI سەزىندە بەلگىلەنگەن جاڭا ماقساتتار مەن مىندەتتەر تۋرالى ەسكە سالىپ، بارلىق باعىتتار بويىنشا جۇمىستى جالعاستىرۋعا شاقىرعان نۇرسۇلتان نازاربايەۆ حالىققا تابىس پەن باق-بەرەكە تىلەدى.
اق تىلەك پەن باتا اعىل-تەگىل اعىلعان شارادا ارداگەرلەردىڭ وبلىستىق كەڭەسىنىڭ ءتوراعاسى ج.ماۋلەنقۇلوۆ، قازاقستان حالقى اسسامبلەياسىنىڭ مۇشەسى ن.شيەۆچەنكو، جاستار وداعىنىڭ مۇشەسى ج.وسەربايەۆ ءسوز سويلەپ، جۇرتشىلىقتى ناۋرىز مەرەكەسىمەن قۇتتىقتادى.
سالتاناتتى شارا سوڭىندا حالىق تەاترلاندىرىلعان كورىنىس پەن كونسەرتتىك باعدارلامانى تاماشالادى. وڭتۇستىكتەگى اعايىنعا مەرەكەلىك كوڭىل-كۇي سىيلاعان شارا شىمكەنت قالاسىنىڭ جاڭا اكىمشىلىك ورتالىعىنداعى «اۋىلىم – التىن بەسىگىم» بارەلەفتىك ساحناسى مەن «كوكپارشى»، «قىز قۋۋ»، «تەڭگە الۋ»، «بۇركىتشى» ارحيتەكتۋرالىق-دەكوراتيۆتىك كومپوزيسيالارىن بىرىكتىرگەن «ناۋرىز الاڭىندا» وتكىزىلدى. جالپى اۋماعى 50 گەكتار بولاتىن ءبىرىڭعاي ارحيتەكتۋرالىق ءانسامبلدىڭ قۇرامىنا تاريحي-ولكەتانۋ مۋزەيى، ءداستۇر جانە عۇرىپتار ورتالىعى، ەتنوپارك، جاساندى كول جانە قولدانبالى ونەر شەبەرحاناسى دا ورنالاستىرىلىپتى.
دەرەككوز: تۇركىستان گازەتى
