سوڭعى 5 جىلدا ەلىمىزدە انا ءولىمى 3 ەسەگە، نارەستە ءولىمى 1،5 ەسەگە ازايدى. مۇنداي مالىمەت ق ر دەنساۋلىق ساقتاۋ جانە الەۋمەتتىك دامۋ ءبىرىنشى ۆيسە-مينيسترى ساليدات قايىربەكوۆانىڭ جامبىل وبلىسىنا جاساعان جۇمىس ساپارى بارىسىندا جاريا ەتىلدى، دەپ حابارلايدى BNews.kz.
بۇگىن ق ر دەنساۋلىق ساقتاۋ جانە الەۋمەتتىك دامۋ ءبىرىنشى ۆيسە-مينيسترى س.قايىربەكوۆا جامبىل وبلىسىنا جۇمىس ساپارى شەڭبەرىندە تاراز قالاسىندا انا مەن نارەستەلەر ءولىمىن، قان اينالىمى جۇيەسى اۋرۋلارىنان بولاتىن ءولىم-جىتىمدى ازايتۋ ءۇشىن جەدەل شارالار قابىلداۋ جونىندەگى رەسپۋبليكالىق شتابتىڭ كوشپەلى وتىرىسىن وتكىزدى.

ۆەدومستۆونىڭ باسپا ءسوز قىزمەتىنەن حابارلاعانداي، جيىنعا ەلىمىزدىڭ وڭتۇستىك وڭىرلەرى: قىزىلوردا، وڭتۇستىك قازاقستان، جامبىل وبلىستارى جانە الماتى قالاسىنىڭ دەنساۋلىق ساقتاۋ باسقارمالارىنىڭ جەتەكشىلەرى، اكۋشەرلىك، گينەكولوگيا جانە پەرينوتولوگيا عىلىمي ورتالىعى، پەدياتريا جانە بالالار حيرۋرگياسى عىلىمي ورتالىعى جانە قازاق مەديسينالىق ۇزدىكسىز ءبىلىم بەرۋ ۋنيۆەرسيتەتىنىڭ باسشىلارى جينالدى. قالعان وڭىرلەر سەلەكتورلىق رەجىمدە قاتىستى.

شتاب وتىرىسىندا قىزىلوردا، وڭتۇستىك قازاقستان جانە جامبىل وبلىستارىندا ورىن العان انا جانە نارەستە ءولىمى جاعدايلارى قارالدى.

بايانداما جاساۋشىلار 2014 جىلعى 11 ايدىڭ قورىتىندىسىندا ەلىمىزدە تۋىلعان بالالاردىڭ جارتىسىنان استامى جانە انالار ءولىم-جىتىمىنىڭ 55،5%-ى وڭتۇستىك وڭىرلەردىڭ ۇلەسىنە تيەتىنىن العا تارتتى.

انا ءولىم-جىتىمى وقيعالارى ورىن العان وڭىرلەر جەتەكشىلەرى، پەريناتالدىق ورتالىقتار مەن پەرزەنتحانالاردىڭ باس دارىگەرلەرى مەديسينالىق كومەكتىڭ قولجەتىمدىلىگى مەن ساپاسىن ارتتىرۋ باعىتىندا جاسالىپ جاتقان ءىس-شارالار تۋرالى باياندادى.

ساليدات قايىربەكوۆا بۇۇ مىڭجىلدىقتىڭ دامۋ ماقساتتارىنا جەتۋ جانە الەمنىڭ ەڭ دامىعان 30 ەلىنىڭ قاتارىنا كىرۋ دەنساۋلىق ساقتاۋ جۇيەسى ءۇشىن باسىم باعىتتاردىڭ ءبىرى ەكەنىن العا تارتتى. ال بۇل سالادا انا مەن بالا دەنساۋلىعىن ساقتاۋ باستى كورسەتكىشتەردىڭ ءبىرى. وسى ورايدا ول «دەنساۋلىق ساقتاۋ جانە الەۋمەتتىك دامۋ مينيسترلىگىنىڭ شاقىرۋىمەن، ءقازىر قازاقستاندا انا ءولىم-جىتىمى كورسەتكىشتەرىن باعالاۋ ءۇشىن دۇنيەجۇزىلىك دەنساۋلىق ساقتاۋ ۇيىمىنىڭ حالىقارالىق تاۋەلسىز ساراپشىلار توبى جۇمىس ىستەپ جاتىر»،-دەدى.

ءبىرىنشى ۆيسە-مينيستر سوڭعى جىلدارى ەلىمىزدە بۇل سالادا اۋقىمدى جۇمىستار اتقارىلىپ، كورسەتكىشتەر ەلەۋلى تۇردە جاقسارعانىن اتاپ ءوتتى. پەرزەنتحانالار مەن بالالاردى ەمدەۋ ۇيىمدارىن ماتەريالدىق-تەحنيكالىق جابدىقتاۋ جاقسارىپ، ءتيىمدى حالىقارالىق تەحنولوگيالار، دياگنوستيكالاۋ مەن ەمدەۋ ستاندارتتارى مەن حاتتامالارى ەنگىزىلۋدە.

انا مەن بالا دەنساۋلىعىن قورعاۋ قىزمەتىنە جاسالعان ساراپتاما العاشقى كومەك بۋىنى بەلسەندى جۇمىس ىستەي باستاعانىن كورسەتكەن. تاۋەكەلى جوعارى ايەلدەردى ۋاقتىلى ەمدەۋگە جاتقىزۋ بارلىق جەردە جولعا قويىلدى.

سونىمەن قاتار، ەلىمىزدە بالالار مەن انالار ءولىمىنىڭ تومەندەۋىنە جۇكتى ايەلدەردى تاۋلىك بويى مونيتورينگىلەۋ جۇيەسىنىڭ ەنگىزىلۋى جانە تاريفكە ەنگىزىلگەن قاراجات ەسەبىنەن دارىگەرلەردىڭ بىلىكتىلىگىن ارتتىرۋ وڭ سەپتىگىن تيگىزدى.

شتاب ءتورايىمى بەكىتىلگەن ستاندارتتار مەن حاتتامالاردى قاتاڭ ساقتاۋعا، بارلىق مامانداردى ۇزدىكسىز جانە ساپالى وقىتۋعا شاقىردى. ويتكەنى، مامانداردىڭ بىلىكتىلىگىن ارتتىرۋعا بولىنگەن قاراجات مەديسينالىق ۇيىمداردىڭ وزدەرىنە بەرىلگەن، تيىسىنشە ولار ءوز ماماندارىن قايدا جانە قالاي وقىتۋ كەرەكتىگىن دەربەس شەشەدى. سونداي-اق، تۇرعىنداردى اقپاراتتاندىرۋ دەڭگەيىن كوتەرۋ كەرەك.

سوڭعى 5 جىلدا ەلىمىزدە انا ءولىمى 3 ەسەگە، نارەستە ءولىمى 1،5 ەسەگە ازايدى. «قازاقستاندىقتاردىڭ ورتاما ءومىر ءسۇرۋ ۇزاقتىعىن ارتتىرۋعا جانە ءولىم-جىتىمدى ازايتۋعا مۇمكىندىكتەرىمىز بەن الەۋەتىمىز بار. ەڭ الدىمەن، ول سەكتورارالىق ءوزارا ىس-ارەكەتتەستىككە قاتىستى، ويتكەنى، ادام دەنساۋلىعى 70-80%-ى ونىڭ ءومىر ءسۇرۋ سالتى مەن قورشاعان ورتاسىنا بايلانىستى»-دەدى ءبىرىنشى ۆيسە-مينيستر.

جۇمىس ساپارى اياسىندا ساليدات قايىربەكوۆا ءبىرقاتار مەديسينالىق ۇيىمداردا: وبلىستىق بالالار اۋرۋحاناسىندا، وبلىستىق پەريناتالدىق ورتالىقتا، № 1، 2، 4، 5، 7، 9 ەمحانالاردا جانە وبلىستىق جانە قالالىق بالالار اۋرۋحاناسىندا بولىپ، مەديسينالىق قىزمەتكەرلەرمەن جانە ازاماتتارمەن كەزدەستى.
 

دەرەككوز: بي-نيۋس