ۇلىبريتانياعا ساپارى بارىسىندا قازاقستان پرەزيدەنتى نۇرسۇلتان نازاربايەۆ ۇلىبريتانيا جانە سولتۇستىك يرلانديا بىرىككەن كورولدىگىنىڭ پاتشايىمى ءىى ەليزاۆەتامەن كەزدەستى. بۇل تۋرالى «قامشى» پورتالى اقورداعا سىلتەمە جاساپ حابارلايدى.
ەلباسى كەزدەسۋ بارىسىندا پاتشايىمعا بىرىككەن كورولدىككە ساپارىنىڭ قورىتىندىلارى تۋرالى اڭگىمەلەي وتىرىپ، ەكى جاقتىڭ اراسىندا كوپتەگەن كەلىسىمدەردىڭ جاسالعانىن ريزاشىلىقپەن اتاپ ءوتتى. قازاقستان پرەزيدەنتى ەلىمىزدىڭ سىرتقى ساياساتىندا بريتاندىق ۆەكتوردىڭ ماڭىزى جوعارى ەكەنىن، وعان ەلدەرىمىزدىڭ اراسىنداعى جوعارى دەڭگەيدەگى بايلانىستار عانا ەمەس، ىسكەر توپتاردىڭ، اكادەميالىق قوعامداستىقتاردىڭ، سونداي-اق ەكى مەملەكەت ۆەدومستۆولارىنىڭ اراسىنداعى مىقتى سەرىكتەستىك بايلانىستار دا ايعاق بولاتىنىن ايتتى.
سونىمەن قاتار، نۇرسۇلتان نازاربايەۆ قازىرگى ۋاقىتتا جۇرگىزىلىپ جاتقان قازاقستان ەكونوميكاسىن جاڭعىرتۋ جونىندەگى رەفورمالارعا جانە وسى ۇدەرىستە بريتاندىق كاپيتالدىڭ اتقارا الاتىن رولىنە توقتالدى.
ءىى ەليزاۆەتا پاتشايىم دا ءوز سوزىندە نۇرسۇلتان نازاربايەۆتىڭ لوندونعا رەسمي ساپارىنىڭ قورىتىندىلارىنا جوعارى باعا بەرىپ، ونىڭ ناتيجەلەرى ەكى ەل اراسىنداعى دوستىق قارىم-قاتىناستاردى ودان ءارى نىعايتۋعا جانە قازاقستان مەن بىرىككەن كورولدىك حالىقتارىنىڭ وركەندەۋىنە قىزمەت ەتەتىنىنە سەنىم ءبىلدىردى.
ءبىلال قۋانىش
لوندون
