قازاقستاندا شەتەلدىك ۆاليۋتادا يپوتەكالىق نەسيە بەرۋگە تىيىم سالىنادى. پارلامەنت سەناتىنىڭ بانك اكتيۆتەرى مەن كرەديتتەرى بويىنشا كەي زاڭ اكتىلەرىنە وزگەرىستەر مەن تولىقتىرۋلار ەنگىزۋ تۋرالى زاڭ جوباسىن تالقىلاعان جالپى وتىرىسىندا ق ر ۇلتتىق بانكى ءتوراعاسىنىڭ ورىنباسارى قۋات قوجاحمەتوۆ ءمالىم ەتتى، - دەپ حابارلايدى «قامشى» پورتالى قازاقپاراتقا سىلتەمە جاساپ.

ايتا كەتەرلىگى، جالپى وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكىنشى دەڭگەيدەگى بانكتەردىڭ جۇمىس ىستەمەيتىن كرەديتتەرى مەن اكتيۆتەرى، قارجىلىق قىزمەتتەر كورسەتۋ جانە قارجى ۇيىمدارى مەن قازاقستان رەسپۋبليكاسى ۇلتتىق بانكىنىڭ قىزمەتى ماسەلەسى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا تالقىلانعان بولاتىن. 

ۇلتتىق بانك ءتوراعاسى ورىنباسارىنىڭ ايتۋىنشا، زاڭ جوباسىنىڭ نەگىزگى باعىتى بويىنشا بورىشتىق جۇكتەمەنى تومەندەتۋ جانە بانكتىك كورسەتىلەتىن قىزمەتتەردىڭ ايقىندىلىعىن ارتتىرۋ كوزدەلەدى. وسى ارقىلى قارىز الاتىن جەكە تۇلعالاردىڭ قۇقىقتارىن قورعاۋ تەتىكتەرى كۇشەيتىلەدى. بۇنىمەن قوسا، قارجى جۇيەسىنىڭ تۇراقتىلىعىن قامتاماسىز ەتۋ قاراستىرىلادى. ۇشىنشىدەن، كاپيتال نارىقتارىن جانە يسلامدىق قارجىلاندىرۋدى دامىتۋ نورمالارى دا قامتىلىپ وتىر. «تۇتىنۋشىلار قۇقىقتارىن قورعاۋ ءۇشىن ۆاليۋتالىق كىرىسى جوق جەكە تۇلعالارعا شەتەلدىك ۆاليۋتادا يپوتەكالىق قارىزدار بەرۋگە تىيىم سالىنادى. تولەمدەر مەرزىمى ۇزاق ۋاقىت بويى ءوتىپ كەتكەن كەزدە ءبىرىنشى كەزەكتە مەرزىمى وتكەن نەگىزگى بورىشتى جانە سوڭعى كەزەكتە تۇراقسىزدىق ايىبى مەن ايىپپۇلداردى وتەۋ قاراستىرىلادى. سونىمەن قاتار، يپوتەكالىق تۇرعىن ءۇي قارىزىنىڭ شارتى بويىنشا مىندەتتەمە مەرزىمى وتكەن سوڭ 180 كۇننەن كەيىنگى سىياقى مەن تۇراقسىزدىق ايىبىنىڭ مىندەتى اۆتوماتتى تۇردە ەسەپتەن شىعارىلادى. قارىز بويىنشا مىندەتتەمەنى بۇزعان كەزدە جوعارى تۇراقسىزدىق ايىبىن، ايىپپۇلدى جانە ءوسىمپۇلدى ەسەپتەۋدىڭ توقسان كۇندىك شەكتى مەرزىمى بەلگىلەنەدى»، - دەدى ق. قوجاحمەتوۆ. 

ياعني، زاڭ جوباسىندا قارىز تولەۋگە قابىلەتسىز الۋشىنىڭ مىندەتتەمەلەرىنە قاتىستى ەرەكشە ءتارتىپ قاراستىرىلىپ وتىر. ايتا كەتەيىك، بۇرىن قارىز تولەۋگە قابىلەتسىز تۇلعا ەڭ ءبىرىنشى كەزەكتە بانكتەردىڭ شىعىندارىن وتەپ، سوسىن عانا نەگىزگى قارىزىن تولەۋى ءتيىس ەدى. بۇل تۇتىنۋشىلارعا قيىندىق تۋدىرعان بولاتىن. ال جاڭا زاڭ جوباسىندا كەرىسىنشە ءبىرىنشى كەزەكتە نەگىزگى قارىزدى وتەۋ قاراستىرىلادى.