بۇگىن باتىس قازاقستان وبلىسى ورتالىعى ورال قالاسىندا جول پايدالانۋ كاسىپورنى جۇمىسشىلارى قىزىل ارميا ساربازى ميحايل گاۆريلوۆكە قويىلعان ەسكەرتكىشتى ورنىنان الۋعا كىرىستى. بۇل تۋرالى «قامشى» پورتالى ازاتتىق راديوسىنا سىلتەمە جاساپ حابارلايدى.
وبلىستىق تاريحي-مادەني نىسانداردى قورعاۋ ينسپەكسياسىنىڭ وكىلى ابزال بايبەكوۆتىڭ ايتۋىنشا، ەسكەرتكىش مەملەكەت قورعاۋىنداعى نىساندار تىزىمىنەن 2008 جىلى شىعارىلعان. بيىل ماۋسىم ايىندا ورالداعى قورعانىس مينيسترلىگى اسكەري-تەحنيكالىق مەكتەبىنىڭ ديرەكتورى قۇسپان مۇقاتايەۆ قالادا 15 جاستاعى قىزىل اسكەر ميحايل گاۆريلوۆكە 1958 جىلى تەمىر-بەتوننان قويىلعان ەسكەرتكىشتى باسقا جاققا كوشىرۋدى ۇسىنعان. ول باتىس قازاقستان مەملەكەتتىك ۋنيۆەرسيتەتىنىڭ جانىندا تۇرعان ەسكەرتكىشتى قالاداعى اسكەري-تەحنيكالىق مەكتەپتىڭ قاسىنا كوشىرۋ جايلى ۇسىنىس جاساعان.
سوۆەت كەزىندە قىزىل ارميا ساربازى ميحايل گاۆريلوۆكە 20-عاسىردىڭ باسىنداعى ازاماتتىق سوعىس كەزىندە اقتاردىڭ ءبىر وفيسەرىن ءولتىرىپ، ورالدى باسىپ الۋ جوسپارىن قولعا تۇسىرگەنى ءۇشىن ماداق ايتىلاتىن. ول 1919 جىلى نوۆەنكوە ەلدى مەكەنىنىڭ تۇبىندەگى شايقاستا قازا تاپقان.
