بۇگىن جامبىل وبلىسى قورداي اۋداندىق سوتىندا بلوگەر ەرمەك تايشىبەكوۆتىڭ ۇستىنەن قوزعالعان قىلمىستىق ءىس بويىنشا سوت پروسەسى باستالدى. بۇل تۋرالى «قامشى» پورتالى «ازاتتىققا» سىلتەمە جاساپ حابارلايدى.

ءىس الماتى قالاسىنىڭ تۇرعىنى بوتاگوز يسايەۆانىڭ ارىزى بويىنشا قوزعالعان. جامبىل وبلىسى قورداۋ اۋدانىنىڭ 37 جاستاعى تۇرعىنى ەرمەك تايشىبەكوۆ فەيسبۋك الەۋمەتتىك جەلىسىندە جاريالاعان جازبالارىن ارىزدانۋشى ۇلتارالىق ارازدىقتى تۋعىزادى دەپ سانايدى.

تايشىبەكوۆتىڭ ءوزى سوتقا ەكى ءوتىنىش جاسادى. ءبىرى – سوت پروسەسىنە جۋرناليستەردى قاتىستىرۋ، ەكىنشىسى – بۇلتارتپاۋ شاراسىن قاماق تۇرىنەن باسقاعا اۋىستىرۋ. سۋديا جۋرناليستەردىڭ پروسەسكە اۋديو-بەينە جازۋ قۇرالدارىنسىز قاتىسۋىنا رۇقسات بەردى. ال، بۇلتارتپاۋ شاراسىن وزگەرىسسىز قالدىردى.

ەستەرىڭىزگە سالساق، ە. تايشىبەكوۆتىڭ ۇستىنەن ۇلتارالىق ارازدىق تۋعىزدى دەگەن ايىپپەن ۇستىمىزدەگى جىلى 30 ماۋسىمدا قىلمىستىق ءىس قوزعالعان بولاتىن. مۇنداي ارەكەتتەر ءۇشىن زاڭدا ەكى جىلدان جەتى جىلعا دەيىن باس بوستاندىعىنان ايىرۋ جازاسى قاراستىرىلعان.

الايدا، ەرمەك تايشىبەكوۆتىڭ باۋىرى ەردوس اعاسىنىڭ ارەكەتتەرىنەن ەشبىر قىلمىس قۇرامىن كورمەيتىنىن، ول بار بولعانى ءوز ويىمەن بولىسكەنىن، ەشكىمدى ەشقانداي زاڭعا قايشى ارەكەتكە شاقىرماعانىن ايتادى.