بۇكىل قازاقتان «اق سارباس» ايتىپ ءسۇيىنشى سۇرايتىن كۇننىڭ اۋىلى دا الىس ەمەس. سۇيىنشىلەپ باستاماي قايتەمىز، قازاقتىڭ كوشى قايتا جاندانايىن دەپ جاتقاندا!

بۇگىن پارلامەنت سەناتى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ كوشى-قونى جانە جۇمىسپەن قامتىلۋى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ەكىنشى وقىلىمدا تالقىلاپ، قۇجاتتى قابىلدادى.  بۇل تۋرالى «قامشى» پورتالى قازاقپاراتقا سىلتەمە جاساپ حابارلايدى. ۇلى كوشتىڭ قايتا جاندانۋىنا سەبەپكەر بولاتىن زاڭ جوباسى ەندى ەلباسىنىڭ قول قويۋىنا جولدانادى.

 بۇل زاڭ جوباسى بويىنشا قانداستارىمىزعا ەلىمىزدىڭ كەز-كەلگەن وڭىرىنەن ورالمان مارتەبەسىن الۋ، شەتەلدىك ازاماتتارعا قاراعاندا تولەم قابىلەتىن راستاۋسىز ۋاقىتشا تۇرۋ ىقتيارحاتىن الۋ مۇمكىندىگى بەرىلەدى. ال، ۇكىمەت بەلگىلەگەن وڭىرلەرگە قونىستانعان جاعدايدا قانداستارىمىزعا جەڭىلدىكتەر قاراستىرالادى. اتاپ ايتقاندا، بەلگىلەنگەن وڭىرلەرگە بارعان ەتنيكالىق قازاقتاردىڭ كولىك شىعىندارىن وتەپ، قىزمەتتىك باسپانا نەمەسە جاتاقحانادان بولمە بەرۋدى قۇرايتىن الەۋمەتتىك كومەكتەر كورسەتىلەدى. بۇنداي الەۋمەتتىك كومەكتەر ەلىمىزدىڭ ءبىر وڭىرىنەن ۇكىمەت ايقىنداعان ەكىنشى وڭىرىنە قونىستانعان قانداستارىمىزعا دا بەرىلەدى. قانداستارىمىز قازاقستان رەسپۋبليكاسىنىڭ ازاماتتىعنا تۇراقتى تۇرۋ ىقتيارحاتىن العاننان كەيىن ءبىر جىل ىشىندە ءوتىنىش بەرە الادى.

بۇل زاڭ جوباسىنا قاتىستى بايانداما جاساعان سەناتور ءلاززات قيىنوۆ  وسى زاڭدا ەلىمىزدىڭ جوعارعى وقۋ ورىندارىندا وقىپ جاتقان قانداستارىمىزدىڭ ازاماتتىق الۋ ءتارتىبى جەڭىلدەتىلەتىنىن، سولتۇستىك وڭىرلەردەن ءبىلىم العىسى كەلەتىن جاستارعا ارنايى گرانتتار ەنگىزلەتىنىن، قازاقستان اۋماعىندا تۇراتىن قانداستار ەلدەن شىقپاي ۆيزانى سوزدىرۋ ماسەلەلەرى دە شەشىلەتىنىن ايتىپ ءوتتى.

پارالامەنتتىڭ ءبىر جىل بويى تالقىلاپ، قابىلداعان زاڭى ەل ءۇمىتىن اقتايدى دەگەن ۇمىتتەمىز. كوپتەن كۇتكەن ۇلى توي دەگەندەي، كوپتەن كۇتكەن زاڭنىڭ دا ىسكە اسۋىنا شامالى ۋاقىت قالدى. قازاقتىڭ مىنا ۇلى دالاسى قازاققا تولماي، بابالار اڭساعان تولىققاندى ازاتتىققا جەتپەسىمىز انىق. اڭساپ جەتكەن ازاتتىقتى ساقتاپ قالۋ الەمنىڭ قاي جەرىندە ءجۇرس دە بويىندا قازاقتىڭ قانى بار ءار ازاماتتىڭ مىندەتى.  ەلىمىزدىڭ گەوگرافيالىق جانە ساياسي اقۋالىنا قارار بولساق ءار قازاق ازاتتىقتى ساقتاۋدى ءوز مىندەتىنە الۋى كەرەك. سول سەبەپتى، ەندى ءار قازاق ەرتە باستان ءوز وتانىن تاۋىپ، ونىڭ ىشىندە بەلگىلەنگەن وڭىرلەرگە ات باسىن تىرەگەنى ءجون. ەلىمىزدىڭ سولتۇستىك وڭىرلەرىندە قازاقتاردىڭ ۇلەس سالماعانىڭ ءالى كۇنگە 40 پايىزعا جەتپەيتىندىگىن ەسكەرسەك، سولتۇستىك وڭىرلەرگە كوشتى باعىتىن بۇرۋ  كەزەك كۇتتىرمەيتىن ماسەلە.

ەستەرىڭىزدە بولسا، 2013 جىلعى «كوشى-قونى تۋارلى» زاڭنىڭ وزگەرىستەرىنەن كەيىن قازاق كوشى توقتاپ قالا جازداپ ەدى. ەندى بۇل زاڭ جوباسى قابىلدانسا ەكى جاققا دا ءتيمدى بولار ەدى. ويتكەنى، قازاقسىز قازاقستاننىڭ، قازاقستانسىز قازاقتىڭ كۇنى قاراڭ. شەتەلدەگى قازاقتار اسسيميلياسيالانىپ كەتپەۋى ءۇشىن، ەلگە كەلىپ ەلىمىزدىڭ قازاق ۇلتى از شوعىرلانعان ورىندارىن قازاقتارمەن تولتىرۋى كەرەكتىگى ەكى جاقتى قاجەتتىلىك. بۇل قاجەتتىلىكتىڭ ورنىن تولتىرۋ ءۇشىن تەك ەلباسىنىڭ زاڭ جوباسىنا قول قويۋى عانا قالدى.

ەلىمە جەتىپ ۇلتان بولۋعا دا دايىنمىن دەگەن قازاق، قامدانا بەر. كوپ ۇزاماي ەلباسى بۇل زاڭعا دا قول قويىپ قالار. سول كەزدە تاعى ءبىر سۇيىنشىلەيمىز.

تۇردىبەك قۇرمەتحان