ورالداعى ساكەن سەيفۋللين اتىنداعى دارىندى بالالارعا ارنالعان №11 "دارىن" مەكتەپ-ينتەرناتىنىڭ استان ۋلانىپ اۋرۋحاناعا تۇسكەن 129 وقۋشىسى تۇگەل اۋرۋحانادان شىعارىلدى. بۇل تۋرالى «قامشى» پورتالى «ازاتتىق» راديوسىنا سىلتەمە جاساپ حابارلايدى.
باتىس قازاقستان وبلىستىق دەنساۋلىق ساقتاۋ باسقارماسىنىڭ باسپا ءسوز حاتشىسى فليۋرا ساماتوۆانىڭ ازاتتىققا حابارلاۋىنشا، وقۋشىلارعا ديزەنتەريا دەگەن دياگنوز قويىلعان. مەكتەپ اسحاناسىنىڭ 22 جۇمىسشىسى ءقازىر اۋرۋحانادا دارىگەرلەر باقىلاۋىندا.
مەكتەپ-ينتەرنات وقۋشىلار 30 قازاندا استان ۋلانىپ اۋرۋحاناعا تۇسە باستاعان. بۇعان دەيىن جەرگىلىكتى بيلىك وقۋشىلار "مەكەپ اسحاناسىندا اس ءمازىرىنىڭ ساقتالماۋىنان" ۋلانعانىن جانە اسحانانى تەكسەرۋ كەزىندە سانيتارلىق تالاپتاردىڭ بۇزىلعانىن حابارلاعان. ءقازىر مەكتەپ-ينتەرناتتىڭ جۇمىسى ۋاقىتشا توقتاعان.
مەكتەپ-ينتەرنات باسشىلىعى وقۋشىلاردىڭ جاپپاي ۋلانۋىنىڭ سەبەپتەرى تۋرالى بيلىكتىڭ تۇجىرىمىمەن كەلىسپەيدى جانە اسحاناداعى تاماق سانيتارلىق تالاپتارعا ساي بولعان دەيدى.
