2016 جىلدىڭ قاڭتارىنان باستاپ بيۋدجەتتىك سالا قىزمەتكەرلەرىنىڭ ەڭبەكاقىلارى وسەدى. بۇل تۋرالى دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا وسى سالانىڭ ەڭبەككەرلەرىمەن كەزدەسۋ بارىسىندا مالىمدەدى.
ءمينيستردىڭ ايتۋىنشا، جاڭا جىلدان باستاپ دەنساۋلىقساقتاۋ سالاسىندا جالاقى 7-دەن 28 پايىزعا دەيىن كوتەرىلسە، ءبىلىم بەرۋ سالاسى قىزمەتكەرلەرىنىڭ ەڭبەكاقىسى 15-29 پايىزعا وسپەكشى. باسقا دا بيۋدجەتتىك سالالاردا جالاقى 28-40 پايىزعا وسەتىن بولادى.
سونداي-اق، الداعى جىلى بيۋدجەتتىك مەكەمە قىزمەتكەرلەرىنىڭ جالاقىلارى جاڭا جۇيە بويىنشا تولەنەتىن بولادى. ول جۇيە ازاماتتىق قىزمەتشىلەردىڭ لاۋازىمدارىن ءبىلىم، بىلىكتىلىك، اتقاراتىن مىندەتتەرىنىڭ دەڭگەيى مەن كۇردەلىلىگىنە بايلانىستى ءتورت كاتەگورياعا ءبولىپ قاراستىرادى.
ءبىرىنشى، ا بلوگىنا باسشىلىق پەرسونالدار كىرەدى. ياعني، ۇيىمنىڭ ستراتەگيالىق دامۋىنا جاۋاپتى، باسقارۋعا بايلانىستى شەشىمدەر قابىلدايتىن مەكەمەلەردىڭ ءبىرىنشى باسشىلارى مەن ولاردىڭ ورىنباسارلارى، ۇيىمنىڭ باعىنىشتىق دەڭگەيىنە قاراي قۇرىلىمدىق بولىنىستەردىڭ باسشىلارى مەن ولاردىڭ ورىنباسارلارى وسى بلوكتى قۇرايدى.
ەكىنشى، نەگىزگى قىزمەتشىلەر بلوگىنا (ۆ بلوگى) ۇيىمنىڭ نەگىزگى قىزمەتىن قامتاماسىز ەتۋشى ماماندار ەنەدى. بۇل بلوك قاراپايىم تىلمەن ايتقاندا، دارىگەرلەر، مۇعالىمدەر، عىلىمي قىزمەتكەرلەر، الەۋمەتتىك قىزمەتكەرلەر، جوو وقىتۋشىلارى جانە باسقا ۇيىمنىڭ نەگىزگى قىزمەتىنە جاۋاپتى مامانداردان تۇرادى. بۇل قىزمەتكەرلەرگە لاۋازىمدىق وكلادتارىن ديففەرەنسيالانعان ەسەپتەۋ جۇيەسى قولدانىلادى.
ءۇشىنشى، اكىمشىلىك بلوك (س بلوگى) اكىمشىلىك-قۇقىقتىق جانە شارۋاشىلىق قىزمەتتەرىن اتقاراتىن مامانداردى توپتاستىرادى. لاۋازىمداردىڭ بۇل توبىنا زاڭگەرلەر، بۋحگالتەرلەر، ەكونوميستەر، اۋدارماشىلار، شارۋاشىلىق قىزمەت مەڭگەرۋشىلەرى، ت.ب.كىرەدى.
ءتورتىنشى، ومەكشى بلوكقا (D بلوگى) ءىس جۇرگىزۋشىلەر، كاسسيرلەر، كومەندانتتار، حاتشىلار سىندى لاۋازىمداعىلار ەنەدى.
تامارا دۇيسەنوۆانىڭ مالىمدەۋىنشە، جاڭا جىلدان باستاپ وسىرىلەتىن ەڭبەكاقى ءار لاۋازىم يەسىنىڭ ءبىلىمى، بىلىكتىلىگى، جۇمىس تاجىريبەسى سىندى جەكە مالىمەتتەرى بويىنشا تاعايىندالادى.
ەستەرىڭىزگە سالا كەتەيىك، 5 قاراشا كۇنى قازاقستان پارلامەنتى جاڭا «ەڭبەك كودەكسىن» ماقۇلداعان بولاتىن.
