قازاقستاندىق بانكتەردىڭ بانكروتقا ۇشىرايتىندىعى تۋرالى جالعان اقپارات تاراتقان بىرنەشە ادام انىقتالدى. بۇل تۋرالى بۇگىن ق ر باس پروكۋراتۋراسىنىڭ رەسمي وكىلى نۇرداۋلەت سۇيىندىكوۆ ءمالىم ەتتى. «بانكتەردىڭ قارجىلىق احۋالى جونىندەگى اقپاراتتارعا قاتىسى بار بارلىق تۇلعالاردى انىقتاۋ بويىنشا كەشەندى ىزدەستىرۋ شارالارى جۇرگىزىلۋدە. ءبىرقاتار تۇلعالار انىقتالدى جانە ولارعا قاتىستى تەكسەرۋ شارالارى باستالدى»، - دەدى ول. ونىڭ اتاپ وتۋىنشە، تالاپ ارىز ەنگىزىلىپ، قىلمىستىق ءىس قوزعاۋ ماسەلەسى شەشىلۋدە. "باس پروكۋراتۋرا جالعان حابارلامالاردى تاراتۋعا كىنالى تۇلعالاردىڭ بارلىعى قىلمىستىق قۋدالانۋمەن قوسا، ماتەريالدىق جانە زاڭمەن بەلگىلەنگەن وزگە دە جاۋاپكەرشىلىكتەرگە تارتىلاتىندىعىن مالىمدەيدى"، - دەدى ن.سۇيىندىكوۆ. قازاقستان رەسپۋبليكاسى باس پروكۋراتۋراسىنىڭ مالىمدەمەسى سوڭعى كۇندەرى ءار ءتۇرلى كوممۋنيكاسيا قۇرالدارى ارقىلى (الەۋمەتتىك جەلىلەردى قوسا العاندا ينتەرنەت-حابارلامالار، سمس) «سەنتر كرەديت» بانكى، «كاسپيي بانكى» جانە «اليانس بانكىنىڭ» بانكروت بولۋ مۇمكىندىگى تۋرالى اقپارات تارالا باستاعانى ءمالىم. وسى حابارلامالار اتالعان بانكىلەردىڭ سالىمشىلارىن دۇرلىكتىرىپ، ولاردى بانكتىك شوتتارداعى قاراجاتتارىن جاپپاي الۋعا يتەرمەلەۋدە. ناتيجەسىندە، بۇل ارەكەتتەر جۇيە قۇراۋشى بانكتەرگە ايتارلىقتاي زيان كەلتىردى، قوعامداعى الەۋمەتتىك شيەلەنىستىڭ وسۋىنە اكەلىپ سوقتى، سونداي-اق ەلدەگى قارجى ينستيتۋتتارىنا دەگەن تۇرعىنداردىڭ سەنىمىنە نۇقسان كەلتىردى. اتالعان بانكتەردىڭ بانكروت الدىنداعى جاعدايى تۋرالى جالعان اقپاراتتىڭ ەشبىر نەگىزى بولماعاندىعى جانە بولۋى مۇمكىن ەمەستىگى انىقتالدى. سايكەسىنشە، تاراتىلىپ جاتقان مالىمەتتەر كورىنەۋ جالعان بولعان جانە بانكتىك سالاداعى احۋالدى تۇراقسىزداندىرۋعا باعىتتالعان. قازىرگى ۋاقىتتا قۇقىق قورعاۋ ورگاندارى ءتيىستى ارىزداردىڭ نەگىزىندە بانكتەردىڭ قارجىلىق احۋالى جونىندەگى جالعان اقپاراتقا قاتىسى بار بارلىق تۇلعالاردى انىقتاۋ جونىندەگى جەدەل-ىزدەستىرۋ شارالارىن كەشەندى تۇردە جۇرگىزۋدە. ءبىرقاتار تۇلعالار انىقتالدى جانە ولارعا قاتىستى قاجەتتى تەكسەرۋ شارالارى جۇرگىزىلۋدە. تالاپ ارىزدار بەرىلدى. ءقازىر قىلمىستىق ءىس قوزعاۋ جونىندەگى ماسەلە شەشىلۋدە. باس پروكۋراتۋرا جالعان حابارلامالاردى تاراتۋعا كىنالى تۇلعالاردىڭ بارلىعى قىلمىستىق قۋدالانۋمەن قوسا، ماتەريالدىق جانە زاڭمەن بەلگىلەنگەن وزگە دە جاۋاپكەرشىلىكتەرگە تارتىلاتىندىعىن جاۋاپكەرشىلىكپەن مالىمدەيدى. ب ا ق وكىلدەرىنەن قارالىپ جاتقان وقيعالاردى جاريا ەتۋ كەزىندە تەك تەكسەرىلگەن فاكتىلەرگە سۇيەنۋگە جانە شىندىققا سايكەس كەلمەيتىن اقپاراتتىڭ جاريالانۋىنا جول بەرمەۋدى سۇرايمىز.