جەلتوقسان ايىندا قازاقستاندىقتارعا قوسىمشا ءۇش كۇن دەمالىس بەرىلەدى، - دەپ حابارلايدى «قامشى» پورتالى Tengrinews.kz-كە سىلتەمە جاساپ.  

قازاقستاندا 1 جەلتوقسان مەملەكەتتىك مەرەكە - تۇڭعىش پرەزيدەنت كۇنى، ال 16 جانە 17 جەلتوقساندا قازاقستاندىقتار تاۋەلسىزدىك كۇنىن اتاپ وتەدى.

"ق ر مەرەكەلەرى تۋرالى" زاڭىنا جانە ەڭبەك زاڭناماسىنا سايكەس، مەملەكەتتىك جانە ۇلتتىق مەرەكەلەر دەمالىس كۇنى بولىپ ەسەپتەلەدى. سونىمەن قاتار، ەگەر مەرەكە اتاپ وتىلەتىن كۇن دەمالىسقا سايكەس كەلسە، ول كۇندەر ءبىر كۇنگە ۇزارتىلادى. الايدا، بيىل ءۇش مەرەكە دە جۇمىس كۇندەرىنە سايكەس كەلىپ تۇر، سوندىقتان ولار باسقا كۇندەرگە جىلجىتىلمايدى.

ايتا كەتەيىك، تۇڭعىش پرەزيدەنت كۇنى 2012 جىلدىڭ 1 جەلتوقسانىنان اتاپ وتىلە باستادى. بۇل مەرەكەنى اتاپ ءوتۋ تۋرالى شەشىم 2011 جىلى 10 جەلتوقساندا قابىلداندى. ول كەزدە ق ر سەناتىنىڭ جالپى وتىرىسىندا "قازاقستان رەسپۋبليكاسىنىڭ مەرەكەلەرى تۋرالى" زاڭىنا تولىقتىرۋلار ەنگىزۋ تۋرالى" زاڭى قابىلداندى. ول قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى نازاربايەۆتىڭ مەملەكەت الدىنداعى ەرەن جەتىستىكتەرىن تانۋ ماقساتىمەن ۇيىمداستىرىلعان.

قازاقستان رەسپۋبليكاسىنىڭ تاۋەلسىزدىك كۇنى - مەملەكەتتىك باستى مەرەكە، ول جىل سايىن 16 جەلتوقساندا اتاپ وتىلەدى. بۇل كۇنى 1991 جىلى جوعارعى كەڭەس قازاقستاننىڭ تاۋەلسىزدىگى مەن مەملەكەتتىڭ ەگەمەندىگى تۋرالى زاڭدى قابىلدادى. رەسپۋبليكادا ۇلتتىق مەرەكەگە وراي دەمالىس كۇن بولىپ ەسەپتەلەدى جانە كەلەسى كۇن - 17 جەلتوقسان قازاقستان رەسپۋبليكاسىنىڭ دەموكراتيالىق جاڭارۋ كۇنى بولىپ جاريالانعان.