وردا بۇزار شاعىمدا ەلگە كەلىپ ءتىرى ورىستى كوزىممەن كوردىم، بىرەۋىمەن العاش قول الىسقانىمدا ءبىرتۇرلى تىكسىنىپ قالعانىم بار. ونى قويشى! قازاقشا تۇسىنبەيتىن قازاقتى كورگەندە تىپتەن اڭ-تاڭ بولعام. ءبارى ماعان ويىن سىياقتى، ىشتەي بۇلار مەنى تاڭقالدىرۋ ءۇشىن ادەيى قالجىڭداپ جۇرگەن شىعار دەپ تە ويلادىم. قايدام! جاعداي باسقا ەكەن...
ءوزىم دە ەشتەمەگە دايىن ەمەس ەدىم، سەنسەڭىزدەر 2000 جىلى "حاباردىڭ" دۋبلياج بولىمىنە كەلىسىمشارتپەن جۇمىسقا كەلگەنىمدە ءتىلىم سايراپ تۇرعانىمەن، كيريلشە اتىمدى دۇرىستاپ جازا المايتىنمىن.
ماقتانشاق دەمەڭىزدەر، كۇنىڭ ءۇشىن كۇلىك جەيسىڭ عوي، مەندەگى وزگەرىستەر وتە تەز بولدى، اينالاسى 10 كۇندە كيريلدىڭ ارىپتەرىنە قانىعىپ، (كومپيۋتەردە) قاتەسىز جازۋدى مەڭگەرە باستادىم. ەندىگى الىنباس قامال ورىس ءتىلى بولدى، ويىمدا؛ قانشا ۇيرەنسەم دە مىنا قوعامنىڭ "ورىسشا ەڭ ناشار سويلەيتىن مۇشەسى" بولىپ قالارمىن دەگەن كۇدىك تۇردى. مەنىڭ ورىس ءتىلىن ەشقاشان كوڭىل قويىپ ۇيرەنبەۋىمنىڭ بىردەن ءبىر سەبەبى وسى ءۇمىتسىز ويىم دەپ بىلەم. دەي تۇرعانمەن، جىلدار بويى اينالامنان كۇندەلىكتى ەستي ءجۇرىپ قۇلاعىما مىسقالداپ كىرگەن رۋسسكيي يازىك-تەن وسى كۇنى اجەپتاۋىر قور جينالىپ قالىپتى. كەيدە بايقاماي سولاردى جاقسى قۇراستىرىپ جىبەرەم. تەپەر موي رۋسسكيي نە پلوحو.
