وتكەن 12 ايدىڭ ىشىندە استانا قالاسىنداعى ايتۆ (ادامداعى يممۋن تاپشىلىعى ۆيرۋسى) ينفەكسياسىنا شالدىققانداردىڭ سانى 129 ادامعا ءوستى. بۇل تۋرالى استانا قالالىق «جيتس-نىڭ الدىن الۋ جانە وعان قارسى كۇرەس ورتالىعى» مكقك باسپا ءسوز قىزمەتى حابارلادى.
مالىمدەمەدە كەلتىرىلگەندەي، بۇل كورسەتكىش سوڭعى جىلدارمەن سالىستارعاندا 30 پايىزعا كوپ. بۇگىندە استانا قالاسىندا 710 جاعداي تىركەلگەن. ونىڭ ىشىندە ايتۆ جۇقتىرعانداردىڭ باسىم كوپشىلىگىن، ياعني 38،4%-ىن (273 ادام) ينەكسيالىق ەسىرتكىنى قولداناتىندار، سونىڭ ىشىندە باس بوستاندىعىنان ايىرىلىپ، جازاسىن وتەۋشىلەر قۇراسا، 53،5%-ىن (380 ادام) كەزدەيسوق جىنىستىق قاتىناسقا تۇسەتىندەر، 7،8%-ىن باسقا جولمەن جۇقتىرعاندار قۇراپ وتىر.
«بۇدان اۋرۋدىڭ جىنىستىق قاتىناس ارقىلى بەرىلۋ جولى 2012-2013 جىلدارى 60 پايىزعا جەتكەندىگىن كورۋگە بولادى. ال جاس شامالارىنا كەلەر بولساق كەيىنگى جىلدارى ايتۆ جۇقتىرعانداردىڭ 77 پايىزى ەڭبەك جاسىنداعى ياعني 20-39 جاس اراسىنداعى قىرشىن جاستار. بۇل كورسەتكىشتەر ەشكىمدى بەي-جاي قالدىرماسى انىق. اسىرەسە سالا ماماندارى قاتەرلى دەرتتىڭ الدىن الۋ ماقساتىندا تىنىمسىز كۇرەسۋدە»، - دەلىنگەن حابارلامادا.
استانا قالاسى «جيتس-نىڭ الدىن الۋ جانە وعان قارسى كۇرەس ورتالىعى» مكقك بۇگىنگى كۇنى حالىقارالىق ەڭبەك ۇيىمىنىڭ (حەۇ) جانە جاhاندىق باسەكەلەستىك يندەكسىنىڭ كورسەتكىشىن جاقسارتۋ ماسەلەلەرىن ىسكە اسىرۋ اياسىندا استانا قالاسىندا ءوندىرىس ورىندارىندا جانە شاعىن جانە ورتا بيزنەس قۇرىلىمداردا ايتۆ جۇقپاسىنىڭ الدىن الۋعا ارنالعان وقۋ باعدارلاماسىن ەنگىزدى. اتالعان وندىرىستەر مەن بيزنەس قۇرىلىمدارىنا جيتس ورتالىعى ماماندارىنىڭ قاتىسۋىمەن ارنايى سەمينارلار جۇرگىزىلدى. اتاپ ايتقاندا، قالاداعى بارلىق ۆەدومستۆولاردا، وقۋ ورىندارىندا، مەديسينالىق مەكەمەلەردە سونداي-اق ءوندىرىس، ساۋدا جانە ت.ب ورىنداردا بارلىعى 985 ءىس-شارا جۇرگىزىلدى. شارا اياسىندا 77863 ادام قامتىلىپ، قاجەتتى مالىمەتپەن تانىستىرىلدى.
«سونداي-اق اۋرۋدىڭ الدىن الۋ، ساقتانۋ جولدارىمەن تانىستىرۋ جايىندا كەڭىنەن اقپارات بەرۋ ءۇشىن باق-تىڭ ۇلەسى باسىم ەكەندىگىن ەسكەرە وتىرىپ، جيتس ورتالىعىنىڭ تاپسىرىسى بويىنشا 4 بەينەروليك مەملەكەتتىك جانە ورىس تىلدەرىندە جاسالىپ، بىرنەشە تەلەارنالاردا كورسەتىلدى»، - دەيدى جيتس ورتالىعى ۇيىمداستىرۋ ءبولىمىنىڭ مەڭگەرۋشىسىە.مومىنبەكوۆ.
