«اباي مۇراجايىنىڭ كىتاپحاناسى» سەرياسىمەن «اباي تۋرالى ەستەلىكتەر» جيناعى تاعى دا جارىق كوردى. اباي ءومىر سۇرگەن ورتادا كۇن كەشكەن، اقىنمەن ارالاس-قۇرالاس بولعان، كوزىن كورگەن ادامداردىڭ ەستەلىكتەرى – ۇلى اقىننىڭ ءومىرى مەن شىعارماشىلىعىن، ادامدىق تۇلعاسىن زەرتتەۋدە مول اقپارات بەرەدى. 1940 جىلى سەمەي قالاسىندا اباي مۇراجايىن اشۋ تۋرالى ارنايى قاۋلى شىققاننان باستاپ ۇلى اقىنعا قاتىسى بار ەكسپوناتتار جيناۋ جۇمىسى باستالدى. زاتتىق جادىگەرلەرمەن قاتار سول كەزدە كوزى ءتىرى ابايدىڭ زامانداستارى، ۇرپاقتارىنان بار بىلگەن ەستەلىكتەرىن، شىعارمالارىن جيناۋ جۇمىسىن سوناۋ 40-جىلدارى ابايدىڭ نەمەرە ءىنىسى ءارحام كاكىتاي ۇلى ىسقاقوۆ باستاعان بولاتىن. ول ەلدەن جيناعان ەستەلىكتەر، شىعارمالار قولجازبالارى ءبىر توبە بولسا، ءوزىنىڭ ەستەلىكتەرى دە قازىرگى كۇندە قۇندى جادىگەرلەر قاتارىندا. ەستەلىكتەردە ابايدىڭ بويىنداعى اقىندىق ونەرى مەن ماشىقتارى، مىنەز-قۇلىق ەرەكشەلىكتەرى، ءوز ورتاسىمەن قارىم-قاتىناستارى قىزىقتى تۇردە باياندالادى. جيناققا ابايدىڭ مەملەكەتتىك قورىق-مۇراجايىنىڭ قولجاز­بالار قورىندا ساقتالعان ءارحام كاكىتاي ۇلىنىڭ، تۇراعۇل اباي ۇلىنىڭ، كوكباي جاناتاي ۇلىنىڭ، قاسەن قۇسايىنوۆ­تىڭ، ءمۇسىرالى اقساقالدىڭ، داۋلەتيار ستامبەكتىڭ، نيازبەك الداجاروۆتىڭ، احات شاكارىم ۇلىنىڭ ەستەلىكتەرى توپتاستىرىلعان. كىتاپ اباي قۇنانباي ۇلىنىڭ ءومىر­بايانى مەن شىعارماشىلىعىن تەرەڭدەپ تانۋعا قىزىققان زەرتتەۋشىلەر مەن ادەبيەتتانۋشىلارعا، ماگيسترانتتار مەن ستۋدەنتتەرگە، مەكتەپ مۇعالىمدەرى مەن وقۋشىلارىنا، جالپى قالىڭ وقىرمانعا ارنالعان. مەيرامگۇل قايرامبايەۆا