جيرينوۆسكيي، جيرينوۆسكيي دەيمىز. ونىڭ ءسوزى كىم، ءوزى كىم؟ ءبىزدىڭ احمەتبەكوۆ، كوساريەۆ، امانتاي - اتتان دەڭگەيىندەگى كلوۋن ەمەس پە ول؟ ءقازىر ءبىر ءسوز، ودان كەيىن باسقاشا سويلەيدى. ءبىر سوزبەن ايتقاندا، ايتاتىنى - ساندىراق ءسوز. ءبىز باسقا نارسەگە نازار اۋدارايىق: قازاقتا شەگارا بولماعان بۇعان دەيىن دەگەن كىم؟ ءوزىمىزدىڭ باسشىمىزدىڭ ءوزى سولاي ايتىپ وتىرسا، جيرينوۆسكيگە نەسىنە رەنجيمىز؟ كەيىن وعان ءوزى دە ويلانعان بولار، ءقازىر ونداي ايتپاس، ال بولاشاقتا بۇلاي ايتقان كەز كەلگەن ادامدى سوتتايتىنداي دەڭگەيگە جەتۋ كەرەك! اقپاراتتىق قاۋىپسىزدىكتى رەسەيدىڭ قولىنا ۇستاتىپ قويعان كىم؟ ءقازىر وسى ەلدىڭ ىشىندە وتىرعان ءسىز بەن ءبىزدىڭ سوزىمىزدەن، بولماسا، بىلدەي ءبىر ءمينيستردىڭ سوزىنەن گورى جيرينوۆسكيدىڭ ايتقانى تەز تارايدى، ەلدە قوعامدىق پىكىر تۋدىرادى! نەگە؟ نە سەبەپتى، ءبىز ۋكرايناداعى جاعدايعا رەسەي اقپاراتىنىڭ كوزىمەن قارايمىز؟ مەن ءۇشىن، ماسەلەن، جيرينوۆسكيي دە ءبىر، اسىرەۇلتشىلدىق ءۇشىن 77 ادامدى جايراتقان برەيۆيك تە ءبىر! ءبىراق، برەيۆيك قىلمىسىن جاسامايىنشا، وندايدىڭ بارىن دا بىلمەيمىز. ال شەتەلدەگى جيرينوۆسكيي ءسوزى كۇندە قۇلاعىمىزدا تۇرادى! وسىنىڭ بارلىعىن قولدان تاپسىرىپ قويعان كىم؟ جانە ونى قالاي تۇزەيمىز؟ ال بۇدان بىلاي، جيرينوۆسكيي، ليمونوۆ، كنيازيەۆ سياقتىلاردى مۇلدەم ەفيرگە شىعارماۋ، قازاقستانعا كىرگىزبەۋ كەرەك! سول سياقتى كرەمل يدەولوگياسىن كۇندىز - ءتۇنى ءبىزدىڭ اقشامىزعا تاراتىپ جاتقان ەۋرازيا ءتارىزدى ارنالاردى قازاقستان اۋماعىندا تاراتۋدى توقتاتۋ كەرەك!

    ەگەر كۇنى ەرتەڭ قازاقستان بيلىگى جيرينوۆسكيي مەن ليمونوۆتاردىڭ مالىمدەمەسىنە قاتىستى قاتاڭ تالاپتار قويىپ، ول ەكەۋىن ەلگە كىرگىزبەۋ تۋرالى شەشىم شىعارماسا، رەسەيگە بىزدەن كەشىرىم سۇراتا الماسا جانە كەدەندىك وداقتان شىعاتىنىن مالىمدەمەسە، اقوردا سول پوزيسيامەن كەلىسكەن بولىپ شىقپاي ما؟!