قىرعىزستان سىرتقى ىستەر مينيسترلىگى رەسەي مەملەكەتتىك دۋماسىنىڭ دەپۋتاتى، لدپر پارتياسىنىڭ جەتەكشىسى ۆلاديمير جيرينوۆسكييدىڭ پىكىرىنە جاۋاپ رەتىندە مالىمدەمە ازىرلەپ جاتىر. بۇل تۋرالى بىشكەكتە پارلامەنتتىڭ حالىقارالىق ىستەر جونىندەگى كوميتەتىنىڭ وتىرىسىندا ۆەدومستۆو باسشىسى ەرلان ابدىلدايەۆ ايتتى دەپ حابارلايدى "ينتەرفاكس-قازاقستان". "جيرينوۆسكيي جۋىردا ۋكرايناداعى احۋال بويىنشا سويلەگەن سوزىندە ورتالىق ازيا ەلدەرىنىڭ تاۋەلسىز مارتەبەسىنە قاتىستى كۇمان كەلتىردى. ول رەسەي ۋكراينانى عانا ەمەس، ورتالىق ازيا ەلدەرىن دە "ءوز جۇدىرىعىندا" ۇستاۋى كەرەك دەپ مالىمدەدى. ءبىر جارىم جىل بۇرىن ول ءبىزدىڭ رەسپۋبليكاعا قاتىستى مالىمدەمە جاساعان بولاتىن. ءبىز ءتيىستى نوتا جولداپ، جيرينوۆسكييدى پەرسونا نون گراتا دەپ جاريالادىق. ونىڭ سوڭعى مالىمدەمەسىنىڭ ەموسيالىق بوياۋى بار. ءبىز سونداي دەڭگەيدەگى مەملەكەتتىك قايراتكەرلەر ءوز مالىمدەمەلەرىنە اباي بولۋى كەرەك دەپ ەسەپتەيمىز"، - دەدى ابدىلدايەۆ. قىرعىزستان دەپۋتاتتارى جيرينوۆسكييدىڭ سوزىنەن باسقا دا جاعىمسىز اسەرلەردى بايقاپ وتىر. "جيرينوۆسكييدىڭ پىكىرى ينتەگراسيالىق پروسەستەردى ىسكە اسىرۋعا، اتاپ ايتقاندا، ەۋرازيالىق ەكونوميكالىق كەڭىستىك قۇرۋ مەن قىرعىزستاننىڭ كەدەن وداعىنا ەنۋىنە ءقاۋىپ توندىرەدى"، - دەدى ءوز كەزەگىندە حالىقارالىق ىستەر جونىندەگى پارلامەنتتىك كوميتەتتىڭ ءتوراعاسى قانىبەك يمانالييەۆ. سالالىق كوميتەت باسشىلىعى جيرينوۆسكييدىڭ "رەسەيدىڭ ورتاازيالىق فەدەرالدىق وكرۋگىن قۇرۋ ارقىلى ورتالىق ازيا ەلدەرىنىڭ قاتارىن شەكتەۋ" تۋرالى ۇسىنىسىنا بايلانىستى رەسمي مالىمدەمە جاساۋ كەرەك دەپ ەسەپتەيدى. پارلامەنت دەپۋتاتتارى قىرعىزستان سىرتقى ساياسات ۆەدومستۆوسىنا جيرينوۆسكييدىڭ پىكىرىنە قاتىستى اقپارات الۋ ءۇشىن رەسەيدىڭ سىرتقى ىستەر مينيسترلىگىنە نوتا جولداۋدى تاپسىردى. ايتا كەتەيىك، رەسەيلىك ساياساتكەردىڭ "قىرعىزستان رەسەيگە قارىز ورنىنا ىستىقكولدى بەرۋى كەرەك" دەگەن پىكىرى ءۇشىن رەسمي بىشكەك ونى پەرسونا نون گراتا دەپ جاريالاعان بولاتىن.