جيرينوۆسكييدىڭ "ۇسىنىسىن" جەتپىستەن اسقان شالدىڭ كەزەكتى ساندىراعى دەر ەدىم. ول جاستاردى اسىرەۇلتشىلدىققا شاقىرۋى ارقىلى رەسەي يمپەرياسىنا ور قازىپ وتىر. ياكي، فەدەراسيانىڭ ىدىراۋىنىڭ باستاماسى بۇل. سوندىقتان، جيرينوۆسكيي اراكىدىك قازاقستانعا قاتىستى سويلەگەن سايىن ءلاززات الىپ وتىرامىن. ءدال سونىڭ جاسىنداعى كوممۋنيستىك تاربيەنى كورگەن، كسرو دەسە، جانىن ساعىنىش سەزىمى بيلەيتىن قۇرداستارى سەناتتا، تاعى باسقا بيلىكتىڭ ءار سالاسىندا وتىر. الماتىنىڭ الماسىن بىرگە جەپ وسكەن دوستارى عوي ولار. سوندىقتان ولاردان، ياعني كسرو-نى تۇلەتپەكشى بولىپ جۇرگەن، كەدەن وداعىن قولداۋشىلاردان "پەرسونا - نون گراتا جاريالا" دەپ سۇراۋ وتە كۇلكىلى. "سۇراعان سەن اقىماق پا، سۇراتقان حان اقىماق پا؟" دەگەن سياقتى نارسە. ءبىر باسىلىمدا "ۆ. جيرينوۆسكييگە كۇلۋگە بولمايدى، گيتلەر دە وسىلاي باستاعان، سوڭى نەگە اپارعانىن بىلەسىزدەر عوي" دەگەن سىڭايدا جازىپتى. ءيا، نەگە اپارعانىن بىلەمىز. بىت-شىت بولىپ كۇيرەپ قالدى ناسيستىك گەرمانيا. سوسىن گيتلەر ول كەزدە قىلشىلداعان جاس بولاتىن. ال، جيرينوۆسكيي - قاۋساعان شال. گيتلەردىڭ ارتىنان بۇقارا جاپپاي ەردى. رەسەي دەريەۆنيالارى ساموگوننان باس كوتەرىپ، جينالۋى مۇمكىن ەمەس. ءبىزدىڭ ەلگە رەسەي تاراپىنان اسكەري ءقاۋىپ تونبەيدى. يادرولىق قارۋىمىزدى جويار كەزدە اقش، ەۋروپا ەلدەرى جانە باسقا دا الپاۋىت مەملەكەتتەر قازاقستاننىڭ تەرريتوريالىق تۇتاستىعىنا كەپىل بولاتىن قۇجاتقا قول قويعان. قانداي دا ءبىر سىرتقى قاۋىپتەن ولار قورعاۋعا دايىن. جالعىز ءقاۋىپ بار. ول - ەلىمىزدىڭ سولتۇستىك وڭىرلەرىندەگى قاراپايىم ورىستاردىڭ ەكى ازاماتتىعىنىڭ بولۋى. سولتۇستىك وسەتيا مەن ابحازيانى وسى تاسىلمەن وزدەرىنە قاراتتى رەسەيلىكتەر. ءقازىر دە ۋكراينانىڭ وڭتۇستىگىندەگى، قارا تەڭىز جاعاسىنداعى سيەۆاستوۆپولدە دە وسى جاعداي قايتالانىپ جاتىر. ءبىز بۇل ءقاۋىپتىڭ الدىن الۋ ءۇشىن جۇڭگو مەن موڭعوليا قازاقتارىن سول جاققا جاپپاي كوشىرە بەرۋىمىز كەرەك. ۇلتارازدىق قاقتىعىستار ورىن الماسى ءۇشىن ارا اعايىن بولاتىن وقو، جانە قىزىلوردا وبلىسىنان قانداستارىمىزدى سول جاققا بىرتىندەپ قونىستاندىرا بەرگەنىمىز ءجون بولار.
ايدوس جۇقان ۇلى
تاۋەلسىز جۋرناليست
"قامشى" سىلتەيدى.
