قاشاعان كەن ورنىندا مۇناي ءوندىرۋ جۇمىسىن قالپىنا كەلتىرۋدىڭ ناقتى مەرزىمى بەلگىسىز، دەپ حابارلايدى Tengrinews.kz ءتىلشىسى "قازمۇنايگاز" ۇك باسقارما ءتوراعاسى ساۋات مىڭبايەۆقا سىلتەمە جاساپ.
"قاشاعان بويىنشا جۇمىس ءالى دە بەلگىسىز بولىپ بولىپ تۇر. شىعىندار بار. ونىڭ بارلىعى وتكەن جىلعى 1 قازاننان بەرى اقتالماي جاتىر. رەسپۋبليكا ءۇشىن ول جامان ەمەس (مۇناي-گاز قورى ساقتالادى - اۆت.). دەگەنمەن، قازمۇنايگاز ءۇشىن ونىڭ سالدارى بار. وعان قوسا، سول جەردە مۇناي ءوندىرۋ جۇمىسىنىڭ قاشان باستالاتىنى بەلگىسىز بولىپ تۇر"، - دەدى س.مىڭبايەۆ.
ايتا كەتەيىك، الەمدەگى ءىرى كەن ورىنداردىڭ ءبىرى - قاشاعاندا مۇناي-گازدى ءوندىرۋ جۇمىسى وتكەن جىلى قىركۇيەك ايىندا باستالعان بولاتىن. الايدا ءبىر اپتادان كەيىن ول جۇمىس توقتاتىلدى. سەبەبى گاز قۇبىرىندا اقاۋ بارى انىقتالعان. قازان ايىندا مۇناي مەن گازدى ءوندىرۋ جۇمىسى قايتا باستالدى. ءبىراق ەكى اپتا وتكەن سوڭ، ونىڭ الدىندا بولعان سەبەپكە بايلانىستى بارلىق جۇمىستار قايتادان توقتاتىلدى. وسىدان كەيىن قۇبىردىڭ بولشەكتەرى ارنايى زەرتحاناعا جىبەرىلدى.
بۇگىندە North Caspian Operating Co كومپانياسى قاشاعان كەن ورنىنىڭ وپەراتورى بولىپ سانالادى. اتالعان جوباعا قازمۇنايگاز، Eni، ExxonMobil، Royal Dutch Shell، Total جانە Inpex قاتىسۋدا. سونداي-اق، قىتايدىڭ CNPC كومپانياسى قازمۇنايگازدان جوبانىڭ 8،33 پايىزىن ساتىپ العان. گەولوگيالىق زەرتتەۋلەرگە سايكەس، 40 جىلدىڭ ەڭ ءىرى مۇناي-گاز كەنى - قاشاعاندا 4،8 ميلليارد توننا مۇناي بار.
اۆتور: ارمان اسقاروۆ
