جيرينوۆسكييدىڭ ءسوزى قازاق قوعامىن تۋرا تاۋىق قوراعا تۇلكى كىرىپ كەتكەندەي ەتىپ دۇرلىكتىرىپ جىبەردى. دۇرلىگىپ جاتقاندار ارينە، «ەليتاعا جاتپايتىندار». ەليتاعا جاتاتىندار شە؟ جيرينوۆسكيي ولاردىڭ جەتى اتاسىن كوردەن شىعارىپ الىپ تەپكىلەسە دە كونەدى. «كونەدى» دەگەندى دە بارىنشا جۇمسارتىپ ايتىپ وتىرمىز، دۇرىسى قۋانادى. جالپى، ءپۋتيننىڭ ويىنداعى نارسە جيرينوۆسكييدىڭ تىلىندە جۇرەدى. الگى ءسوزدى جيرينوۆسكيي ايتتى دەيتىندەر قاتەلەسەدى. ول ءسوزدىڭ اۆتورى – ورىس بيلىگى. قازاق بيلىگى وسىنداي ساتتەردە نەگە ەرۋلىگە قارۋلى كورسەتە المايدى؟ ءسىز ءقازىر سىرتقى ىستەر مينيسترلىگى قاراپ قالعان جوق قوي دەرسىز. ءويتىپ قاراپ قالماعانىنا... ءبىزدىڭ مينيسترلىكتىڭ تالابى «توقتات!» دەپ قاتاڭ ەستىلگەننەن گورى «قويساڭدارشى» دەيتىن مايدا وتىنىشكە ۇقساپ كەتەدى. قايتا جيرينوۆسكييگە «پەرسونا نون گراتا» جاريالاعان قىرعىز بيلىگىنىڭ ارەكەتى ناعىز ەركەكتىڭ ارەكەتى ەكەن! جيرينوۆسكيي انشەيىن اۋزى كوپىرىپ جۇرگەن بىرەۋ ەمەس. مەملەكەتتىك دۋما ءتوراعاسىنىڭ ورىنباسارى. حالىق قالاۋلىسى. وسىندايدا بىزدەگى «حالىق قالاۋلىلارى» تۋرالى ويلاناسىڭ. جيرينوۆسكيي سپيكەردىڭ ورىنباسارى بولسا، جايشىلىقتا «ماكە، ساكە دەگەندى قويىڭدار، پالەنشە تۋگەنشەيەۆيچ دەڭدەر» دەپ كوسەمسيتىن نۇرلان نىعماتۋللين سپيكەردىڭ ءوزى! تاۋەلسىز ەل پارلامەنتىنىڭ سپيكەرى! قايدا، سول كوسەم نىعماتۋللين؟ قايدا «قۇرمەتتى دەپۋتاتتار» دەگەننىڭ ءوزىن نازىرقانىپ، «نەگە دەپۋتات مىرزالار!» دەپ ايتپايسىڭدار؟» دەپ شاتقاياقتايتىن حالىق قالاۋلىلارى؟ جيرينوۆسكييدىڭ الگى مالىمدەمەسىنە ولار نەگە ۇندەمەيدى؟ سوندا بۇلار كىمگە قالاۋلى بولىپ ءجۇر؟ وسىندايدا «قازاق جۋاس قوي» دەگەندى ماقتانىشپەن ايتاتىنداردى ءيتتىڭ ەتىنەن جەك كورىپ كەتەدى ەكەنسىڭ. وسىدان 23 جىل بۇرىن «جۋاس دەگەن جاماننىڭ سىپايى اتى» دەپ كۇيىنىپ جازعانىمىز بار ەدى. مىنا تۇرىمىزبەن 23 جىل ەمەس، 50 جىل وتسە دە سول كۇيىگىمىزدىڭ جازىلمايتىن ءتۇرى بار-اۋ. سونىمەن، قازاقتىڭ نامىسى قازاقتىڭ دەپۋتاتتارىنا كەرەك ەمەس سياقتى. قازاقتىڭ نامىسى كەرەك ەمەس دەپۋتاتتار قازاققا كەرەك پە، ءوزى؟ ويلانىپ كورەتىن ماسەلە ەكەن...

اباي بالاجان