قايداسىڭ، يانۋكوۆيچ؟ ۋكراينا بۇرىنعى پرەزيدەنتى ۆيكتور يانۋكوۆيچتى ىزدەپ، تاپپاي جاتىر. كييەۆتەگى توڭكەرىستەن كەيىن ونىڭ حاركوۆ قالاسىنا بارعانى بەلگىلى. مۇنى دالەلدەيتىن بەينەجازبا دا بار. كەيبىر مالىمەتتەردە ونىڭ سول جەردەن بىرىككەن اراب امىرلىكتەرىنە ۇشىپ كەتكەنى ايتىلعان-دى. “دونەسكيە ۆەستي” گازەتىنىڭ حابارلاۋىنشا، يانۋكوۆيچتىڭ ۇشاعىنىڭ بىرىككەن اراب امىرلىكتەرىنە ۇشىپ كەتكەن راس. ءبىراق ونىڭ ىشىندە يانۋكوۆيچ بولماعان. بۇل جۇرتتىڭ نازارىن باسقا جاققا اۋدارۋ ءۇشىن جاسالعان قۋلىق. گازەتكە حابار جەتكىزگەن سەنىمدى دەرەككوزدىڭ مالىمەتىنشە، ۆيكتور يانۋكوۆيچ حاركوۆ قالاسىنىڭ تۇبىندەگى ساياجايدا تىعىلىپ جاتىر. بۇل ساياجاي جەرگىلىكتى ىقپالى زور شەنەۋنىكتىكى. يانۋكوۆيچ ءالى كۇنگە سوندا تىعىلىپ وتىر ما، جوق پا، ول جاعى بەلگىسىز. كەيبىر مالىمەتتەردە ۆيكتور يانۋكوۆيچتىڭ ماشينامەن قىرىمعا قاراي قاشىپ كەتكەنى ايتىلادى. ۋكراينانىڭ «بوستاندىق» ۇلتشىل پارتياسىنىڭ جەتەكشىسى ولەگ تياگنيبوكتىڭ ويىنشا، يانۋكوۆيچ رەسەيدىڭ قارا تەڭىز فلوتى جالعا العان ۋكراينانىڭ سيەۆاستوپول قالاسىندا. يانۋكوۆيچكە قولداۋ كورسەتۋ ماقساتىندا رەسەي وسى قالاعا ءوز اسكەرىن كىرگىزبەكشى. وسىدان ءبىر كۇن بۇرىن «يانۋكوۆيچ قىرىمدا ۇستالدى، ونى ارنايى ۇشاقپەن كييەۆكە الىپ كەلە جاتىر» دەگەن اقپارات ايتىلعان. ءبىراق، بۇل ءسوز بەكەر بولىپ شىقتى. ۆيكتور يانۋكوۆيچتىڭ قاي جەردە جاسىرىنىپ جۇرگەنى جونىندە ءتۇرلى بولجام ايتىلادى. بىرەۋلەر ونىڭ ماسكەۋدە وتىرعانىن ايتسا، ەندى بىرەۋلەر يانۋكوۆيچ ۋكرايناعا ىرگەلەس جاتقان رەسەي قالالارىنىڭ بىرىندە دەپ ەسەپتەيدى. قالاي بولعاندا دا، وسى بولجام كوڭىلگە قونىمدى. سەبەبى، حاركوۆ، سيەۆاستوپول، كەرچ سياقتى قالالاردىڭ حالقىنىڭ باسىم بولىگى ۋكراينانىڭ جاڭا بيلىگىن مويىنداماعانىمەن، ول جەرلەردەگى ۋكراينانىڭ قاۋىپسىزدىك قىزمەتى مەن باسقا ورگاندار كييەۆكە باعىنادى. ەلدىڭ ورتالىق بيلىگى يانۋكوۆيچتى كييەۆتەگى قىرعىنعا كىنالى دەپ تاۋىپ، قىلمىستىق ءىس قوزعاپ، وعان ىزدەۋ جاريالادى. سوندىقتان ونىڭ ۋكراينا اۋماعىندا تىعىلىپ ءجۇرۋى ءقاۋىپتى. ۋكراينانىڭ ارناۋلى قىزمەتى تىمىسكىلەنىپ ءجۇرىپ، ونى كەز كەلگەن ۋاقىتتا ۇستاپ الۋى مۇمكىن. ال ۋكراينانىڭ جاڭا بيلىگى كەزەكتەن تىس پرەزيدەنتتىك سايلاۋ وتكىزۋ ناۋقانىن جاريالادى. پرەزيدەنتتىككە ۇمىتكەرلەردى تىرگەۋ 25 اقپانان 4 ساۋىرگە دەيىن سوزىلادى، پرەزيدەنتتىك سايلاۋ 25 مامىردا وتەدى. ازىرگە پرەزيدەنتتىك سايلاۋعا قاتىسقىسى كەلەتىنى جونىندە حاركوۆ وبلىسىنىڭ گۋبەرناتورى ميحايل دوبكين، وپپوزيسيانىڭ ليدەرلەرى يۋليا تيموشەنكو مەن ۆيتاليي كليچكو مالىمدەدى. ءبىراق، ولار دا ءالى ورتالىق سايلاۋ كوميسسياسىنا جازباشا ءوتىنىش بەرگەن جوق.