كەشە عانا ەلباسى نۇرسۇلتان نازاربايەۆ ەلدىڭ جاڭا جىلدىق باس شىرشاسىن جاعىپ، قازاقساتان حالقىن كەلە جاتقان جاڭا جىلمەن قۇتتىقتادى. جالپى، جەلتوقسان ايى تۋا سالىسىمەن بۇكىل الەمنىڭ جاڭا جىلعا دايىندىق كورەتىنى وتىرىك ەمەس. سوندىقتان، ەلباسى دا ەلدەن قالماي ءوز حالقىن قۇتتىقتاپ، جاڭا جىلدان جاقسى جاڭالىقتار كۇتكەنىنىڭ نەسى ايىپ دەيتىن شىعارسىز؟
ءبىز وزگەلەر سياقتى جەلتوقسان تۋا سالىسىمەن جاڭا جىلعا جوسپار قۇراتىن حالىقتىڭ قاتارىنان ەمەسپىز. الدىمىزدا كەشەگى كەنەسارى حان مەن ماحامبەتتىڭ، ءاليحان مەن احمەتتىڭ، قايرات پەن ەربولدىڭ باسى مەن قانى تەككە كەتپەدى دەپ ءوزىمىزدى جۇباتا الاتىن، كوك تۋىمىزدى كوكىمىزدە قالىقتاتقان ەڭ ءبىر ۇلى كۇنىمىز تۇعىرلى تاۋەلسىزدىكىمىز تۇر ەدى. ارينە، جەلتوقساننىڭ 16 كۇنى تاۋەلسىزدىك كۇنىمىز ەكەنىن ۇمىتا قويماعان بيلىكتە تۇلعالار جوق ەمەس. كەشەگى اكىم، بۇگىن ءىستى بولىپ وتىرعان باۋىرجان ابدەشوۆتان باستاپ، قازىرگى «نۇر وتان» پارتياسى ءتوراعاسىنىڭ ءبىرىنشى ورىنباسارى اسقار مىرزامحمەتوۆ مىرزاعا دەيىنگى بىرنەشە شەندىلەر قازاق ەلىندە تاۋەلسىزدىك كۇنى وتپەيىنشە، جاڭا جىلعا دايىندىق جاسالعانىن قالاماعان ەدى.
وڭتۇستىكتە تاۋەلسىزدىك كۇنى وتكەنشە شىرشا جاقپاق تۇرماق، «جاڭا جىدىڭىزبەن» دەگەن ءبىر ءسوز جازعىزباعان اسقار مىرزاحمەتوۆ پەن بەرىك ءۋالي «نۇر وتانعا» كەلگەن سوڭ، يگى ءداستۇردى بۇكىل ەلگە جالپىلاستىرماق بولىپ ەدى، وكىنشىكە وراي، استانا مەن الماتى قالاسى باستاپ، اقوردا قوشتاپ جاڭا جىلدىڭ دايىندىعى جىلداعىداي باستالىپ كەتتى. سولاي، بيلىك جاقتان جىلتىرعان ءۇمىت ساۋلەسى دە ءۇزىلدى. بيلىككە تاۋەلسىزدىك كۇنىمىز كەرەك ەمەس شىعار؟ ءبىراق، قاراپايىم ءار قازاق ءۇشىن تاۋەلسىزدىكتەن ارتىق ءقاستارلى ۇعىم جوق. ءدال وسى كۇننىڭ قانداي اۋىر قۇرباندىقتارمەن كەلگەنى بارشا قازاققا بەلگىلى عوي. قاندايدا ءبىر جەڭىس اۋىر بوداۋلار بەرمەي كەلمەسى انىق. كەنەسارى، يساتاي، ماحامبەتتەردىڭ، الاش ارىستارىنىڭ قولى جەتپەي كەتكەن ازاتتىق ءبىزدىڭ باسىمىزعا قوندى. الىپ يمپەريانىڭ ىرگەسىنىڭ سوگىلىۋىنە سەبەپ بولعان جانە ايااۋسىز قازاق جاستارى قىرعىنعا ۇشىراعان 16 جەلتوقسان كۇنى مەن تاۋەلسىزدىگىمىزدىڭ ءبىر كۇنگە كەلۋى - تاۋەلسىزدىكتىڭ وتە اۋىر جولدار باسۋ ارقىلى كەلگەنىن قازاققا ۇمىتتىرماۋ بولسا، جاڭاوزەندەگى جاعداي تاۋەلسىزدىكىمىزدىڭ باعاسىنا جەتەلماي جۇرگەنىمىزدىاللانىڭ ەسكەرتۋى شىعار.
ەندەشە، «جاڭا جىلدىڭ» الدىنا «تاۋەلسىزدىگىمىزدى» قالاي شىعارا الامىز؟ بۇل جاعى كوپتى مازالاسا دا، جاسالىپ جاتقان ناقتى ارەكەت شامالى. بيلىك، ۇكىمەت، قالا اكىمشىلىكتەرى ەلەمەدى دەيىك، سوندا ءوزىمىز نە تىندىرىپ جاتىرمىز؟ ءار قالاداعى قاپتاعان شىرشالاردىڭ ءبارىن اكىمدەر قويماعانى انىق! سولاردىڭ ورىنىنا بولماسا دا، وزىمىزگە تيەسىلى جەرلەرگە تاۋەلسىزدىگىمىزدى ايقىندايتىن، تاۋەلسىزدىك كۇنى كەلە جاتقانىن بىلدىرەتىن بەلگىلەر قويساق قايتەر ەدى؟ كوزگە كورىنەرلىك ءار جەر تاۋەلسىزدىك كۇنى كەلە جاتقانىن كورسەتىپ تۇراتىنداي بولۋى كەرەك. قوعامدىق كولىكتەرگە، الەۋمەتتىك ورىنداردىڭ ءار جەرىنە تاۋەلسىزدىك تۋرالى رۋحتى سوزدەر ءىلىنىلۋى ءتيىستى. ءتىپتى، اركىم ءوز قىزمەت كەڭسەسىنە قويسا دا، «تاۋەلسىزدىك كۇنى قۇتتى بولسىن» دەگەن قاعازدار جاپسىرسا دا، بىر-بىرىمىزگە سىيلىق سىيلاپ جاتساقتاتاۋەلسىزدىككە قۇرمەتىمىز بولار ەدى. قاستەرلى قۇندىلىعىمىز تاۋەلسىزدىكتىڭ ءقادىرىن باعالاسا الدىمەن قازاق باعالاۋى زاڭدى!
تاۋەلسىزدىك كۇنىن ءوزىمىز باسقارعا سەزدىرە بىلەيىك. ونى سەزدىرەتىن، بىلدىرەتىن ءسىز بەن ءبىز، تەك قازاقتار عانا. سەبەبى، تاۋەلسىزدىگىمىز تەك وزىمىزگە، تەك قازاققا كەرەك. «ءبىر ەل، ءبىر تاعدىر» دەپ ۇراندايمىز عوي. ءبىز، سول تاعدىرىن بىزبەن ۇشتاستىرعاننىڭ بارىنە وسى كۇنىمىزدى ۇلىقتاتا ءبىلۋىمىز كەرەك. ءار مەكەمە، وزىندە تاۋەلسىزدىك كۇنى مەن جەلتوقسان كوتەرىلىسىنە ارناپ ءىس شارالار وتكىزۋگە مىندەتتى. ول شارالار تەك ءبىر ادامنىڭ باسىنا عانا ماقتاۋ بولىپ كەتپەي، تۇتاس تاۋەلسىزدىككە ۇمتىلعان قادامدارىمىزدىڭ بارىنە توقتالا كەلىپ 1986- جىلعى قازاق جاستارىنىن اسقاق رۋحىن جەتكىزە ءبىلۋ كەرەك. اسىرەسە،ونداي شارالاردى بولاشاق ۇرپاقتى تاربيەلەپ وتىرعان وقۋ ورىندارى باستى نازارعا العاندارى ءجون.
ءارقانداي ءبىر قاسىرەتتىڭ ارتىنان اق تاڭ اتىپ، ەل قۋانىشقا بولەنەرى انىق. ءبىزدىڭ جەلتوقسانداي قاسىرەتىمىزدىڭ ارتىنان تاۋەلسىزدىگىمىز تۋدى. سوندىقتان، 16- جەلتوقسان كۇنى الدمەن 1986 جىلعى جەلتوقسان كوتەرىلىسىنىڭ قۇرباندارى مەن بارشا تاۋەلسىزدىك جولىندا قۇربان بولعان ارىستارىمىزدىڭ رۋحىنا تاعزىم ەتىپ، ارناۋلى استار بەرىپ ءتىپتى قۇرباندىقتار شالۋ كەرەك. سوندان ارى قاراي قاسىرتەتىمىزدىڭ ارتىن تويعا ۇلاستىرىپ ەل بىرلىگىن، مەملەكەت قۋاتتىلىعىن كورسەتەتىن شارالاردى ۇيىمداستىرىپ،ايبىندى اسكەري شەرۋلەر جاساپ، بۇكىل الەمگە ەندى الاشتى ەشكىمگە قورلاتا قويمايتىن كۇشىمىزدى كورسەتۋىمىز كەرەك ەدى.
ءسوزىمنىڭ باسىن جاڭا جىلمان باستاپ ەدىم، جاڭا جىلمان اياقتايىن. كوپ حالىق جاڭا جىلدى سىرتقا شىعىپ الاڭداردا وتكىزەدى عوي. مەن سوعان قىزىعام. تاۋەلسىزدىك كۇنىمىزدى ودان دا كوپ بولىپ جينالىپ، بىرگە وتكىزۋ ارماىم عوي. ول كۇنى بيلىك ادامداردىڭ جينالۋىنان قورىقپاي، جاستاردى قاماپ ۇستاماي، حالىق پەن بيلىك اراسىنا ءوزارا سەنىم ورناتا وتىرىپ، بارشامىز جينالىپ، ءبىر الاڭدا وتكىزەتىن كۇن تۋسا دەيمىن.
قۇرمەتتى وقىرمان، كەلە جاتقان تاۋەلسىزدىك كۇنىمىز قۇتتى بولسىن!
تۇردىبەك قۇرمەتحان
