قاراعاندىدا ءوتىپ جاتقان ەكس-پرەمەر-مينيستر سەرىك احمەتوۆ پەن قاراعاندى وبلىسى مەن قالاسىنىڭ ەكس-شەنەۋنىكتەرىنە قاتىستى سوت ءىسى اياقتالۋعا جاقىن. ءقازىر قاراعاندى وبلىستىق سوت زالىندا ەكى جاقتى پىكىرتالاس ءوتىپ جاتىر. جاقىن ارادا 21 سوتتالۋشىعا قاتىستى سوت ۇكىمى جاريالانتىن بولادى، دەپ حابارلايدى BNews.kz ءتىلشىسى.

 پىكىرتالاستىڭ العاشقى كۇنىندە مەملەكەتتىك ايىپتاۋشى ديار ءادىلوۆ الدىن-الا كەسىپ ايتقان تالاپتارى وزگەرگەنىن مالىمدەپ، سوت ءىسىنىڭ باستى ايىپتالۋشىسى سەرىك احمەتوۆتى 5 جىل مەملەكەتتىك قىزمەتتەن الاستاتىپ، مۇلىكتىك تاركىلەۋ جاريالاۋدى جانە 12 جىلعا باس بوستاندىعىنان ايىرۋدى تالاپ ەتتى.

سوت وتىرىسى بارىسىندا سوتتالۋشى سەرىك احمەتوۆكە قاراعاندى وبلىسى اكىمى لاۋازىمىن پايدالانىپ قىزمەتكەرلەرگە قىسىم كورسەتتى دەگەن ايىپ تاعىلدى. جاۋاپقا تارتىلعان ايىپتالۋشىلاردىڭ ءبىرى «سەنترستروي-كومپلەكت نس» ج ش س وكىلى ءالجان اقمولدايەۆ ەكس-پرەمەر-مينيستر سۋ قۇبىرلارىن تازالاۋ ستانساسىن سالۋ كەزىندە مەردىگەرلىك ۇيىمداردى تاڭداۋدا زاڭسىزدىققا جول بەرگەنىن ايتتى.

اقمولدايەۆتىڭ ايتۋىنشا، احمەتوۆ 4 ملن دوللار كولەمىندە پارا العان.

سونداي-اق، سوت وتىرىستارىنىڭ بىرىندە جىلىجاي قۇرىلىسى جايلى دەرەكتەر كەلتىرىلدى. «توپار جىلىجايلارى» ج ش س كەلىسىمىنىڭ باعاسى زاڭسىز جولمەن ۇلعايتىلعان دەگەن اقپارات ءتۇستى. ودان مەملەكەتكە 1،1 ملرد تەڭگە زالال كەلگەن.

وسى سياقتى بىرنەشە ايىپ تاعىلعان سەرىك احمەتوۆ ىسىنە قاتىستى سوت ۇكىمى جاقىن ارادا جاريالاناتىن بولادى.

كىلت سوزدەر:

 «قامشى» سىلتەيدى