شەشەنستان استاناسى گروزنىي قالاسىندا وتكەن رف پرەزيدەنتى كۋبوگىندا قازاق ەلىنىڭ ەسكى ءانۇرانى تاعى شىرقالدى. الايدا، يليا يلين مەن الەكساندر زايچيكوۆتىڭ تاباندىلىعىنىڭ ارقاسىندا ءشامشىنىڭ «مەنىڭ قازاقستانىمى» - قازىرگى تاڭداعى مەملەكەتتىك گيمن قايتادان قويىلدى. ەگەر دە اتالعان ازاماتتاردان بولەك باسقا سپورتشىلار بولسا جاڭا ءانۇراندى قويۋدى تالاپ ەتپەستەن تۇعىردان ءتۇسىپ كەتەرمە ەدى؟ ويتكەنى، مۇنداي جاعداي بۇعان دەيىن بىرنەشە رەت قايتالاندى.

«مەنىڭ قازاقستان» ءانىنىڭ مەملەكەتتىك ءانۇران بولىپ بەكىتىلگەنىنە 10 جىلعا جۋىقتادى. مىنە، وسى ۋاقىت ارالىعىندا وتكەن حالىقارالىق جارىستاردا بىرنەشە رەت ەسكى ءانۇران شىرقالدى. وكىنىشكە وراي، 2006 جىلدان بەرى قانشا رەت ورەسكەل قاتەلىك كەتكەنىن ءدوپ باسىپ ايتۋ قيىن. الايدا كەي كەزدەرى ەسكى انۇرانمەن جىلاپ كورىسەتىن جاعدايعا جەتتىك.

ناقتىراق ايتساق،  2012  جىلى كۋۆەيتتە وتكەن مەرگەندەر تۋرنيرىندە «بورات» كينوفيلمىنىڭ ءانى قويىلعان بولاتىن. ءبىر قىزىعى، اتالعان سايقىمازاق ءاندى ماريا دميتريەنكو قولىن جۇرەگىنە قويعان كۇيى اياعىنا دەيىن تىڭداپ شىقتى. سونداي-اق، قوستاناي وبلىسىنىڭ بۇرىنعى اكىمى نۇرالى ءسادۋاقاسوۆ قاتىسقان ءىس-شارادا مەملەكەتتىك  ءانۇرانىنىڭ ورنىنا ريكي مارتيننىڭ ءانى قويىلعان ەدى.

بۇل از دەسەڭىز بيىل رەسەيلىك قازاق اقتاڭ ءسۇيىنىشالىين ەلىمىزدىڭ ءانۇرانىن ورىس تىلىنە اۋدارىپ، «ايدى اسپانعا» شىعاردى. ونىڭ ايتۋىنشا مەملەكەتتىك ءانۇراندى ورىس تىلىنە اۋدارعاندا تۇرعان ەشقانداي سوكەتتىك جوق. سوندىقتان دا، ول الداعى ۋاقىتتا ءانۇرانىمىزدى اعىلشىن جانە جۇڭگو تىلىنە اۋدارامىن دەپ قۇلشىنىپ وتىر. الايدا، اقتاڭنىڭ ايتقانىمەن كەلىسپەيتىن ازاماتتار ارامىزدا بارشىلىق. سولاردىڭ ءبىرى ءھام بىرەگەيى مارات ماداليموۆ. ونىڭ ايتۋىنشا ءانۇراندى اۋدارۋ – قازاقتى مازاقتاۋدىڭ بىردەن ءبىر كورىنىسى.

– زاڭگەرلەردىڭ ايتۋىنشا ەلىمىزدىڭ ءبىرىنشى ءنومىرلى ءانىن باسقا تىلگە اۋدارۋ ارقىلى اقتان ءسۇيىنىشالين قازاق ەلىنىڭ قولدانىستاعى زاڭىن ورەسكەل بۇزىپ وتىر. دەمەك، زاڭدى بۇزىپ وتىرعان ماسكەۋلىك قازاق ءسوز جوق، كودەكستە كورسەتىلگەن تارماقتار بويىنشا جازاسىن الۋعا ءتيىس. باسقاسى باسقا، بۇتىندەي ءبىر ەگەمەن ەلدىڭ ءانۇرانىن وزگە تىلگە اۋدارىپ، مەرەكەلەردە شىرقالاتىن روك، رەپ سياقتى «زاماناۋي جىندى بيلەردىڭ» قاتارىندا سەكەڭدەتىپ قويۋ، شىنىن ايتقاندا، تازا كەلەكەلەۋ بولىپ سانالادى، – دەيدى مارات ماداليموۆ.

جوعارىدا سوڭعى 10 جىلدا بىرنەشە رەت ەسكى ءانۇرانىمىزدىڭ شىرقالعانىن تىلگە تيەك ەتتىك. ەگەر ءدال وسىلاي قاتەلىك جىبەرە بەرەتىن بولساق، الداعى ۋاقىتتا ەسكى ءانۇرانعا ەتىمىز ابدەن ۇيرەنىپ كەتۋى مۇمكىن. سوندىقتان دا، مادەنيەت جانە سپورت مينيسترلىگى بۇل ماسەلەنى قاتاڭ باقىلاۋىنا الىپ، ولقىلىق جىبەرمەۋگە تىرسىپ باعۋى كەرەك. ول ءۇشىن ارينە ارىستانبەك مۇحامەديا ۇلىنىڭ باسى باقىتتان باسى اينالماي، جەرگە ءتۇسۋى ءتيىس. ايتپەسە ەسكى ءانۇراندى قويۋ قالىپتى جاعدايعا اينالىپ كەتۋى مۇمكىن.

ونىڭ ۇستىنە، ازيادا، دىندەر فورۋمى، وSCE ءسامميتى، مەديافورۋم، EXPO سىندى اتىنان ات ۇركەتىن ءىرى حالىقارالىق جوبالارعا مۇرىندىق بولىپ جۇرگەن قازاقستاننىڭ ءوز ءانۇرانىن جۇرتقا ءالى كۇنگە تانىتا الماي كەلە جاتقانى قيسىنسىز ەمەس پە؟

سەرىك جولداسباي

استانا