2016 جىل جۋرناليستەر قاۋىمى ءۇشىن قۋانىشتى وقيعالارمەن باستالماق. ماسەلەن، جىل باسىندا رەسپۋبليكالىق «اقبوساعا» گازەتىنىڭ قازاق وتباسىنىڭ بەرەكەسى مەن بىرلىگىنىڭ ۇيىتقىسىنا اينالعانىنا تۇپ-تۋرا 25 جىل تولادى. قازاق  قىزدارىنا  ءتان  تۇراقتىلىق،  ادالدىق،  قايىرىمدىلىق، يماندىلىق  جانە  ءور  مىنەزدەن  تايماي، ادىمداپ كەلە جاتقان «اقبوساعانىڭ» جۋرناليستەرى «جۇرەكتەن  شىققان  ءسوز  عانا  جۇرەككە  جەتەدى» دەگەن ۇستانىممەن 25 جىل بويى وقىرمان جۇرەگىنە جول تابۋمەن كەلەدى. ەلىمىزگە تانىمال جۋرناليست، جاس قالام يەلەرىنىڭ ۇستازىنا اينالعان شولپان ۇعىباي قىزىنىڭ باسقارۋىمەن اي سايىن جارىق كورىپ وتىرعان «اقبوساعا» گازەتى شىنايى دا تارتىمدى ماقالالارىمەن، تاقىرىپقا ساي، اكتۋالدى دا قايتالانباس سۋرەتتەرىمەن وقىرمانداردىڭ ىقىلاسىنا يە. «اقبوساعا» گازەتىنە جازىلعان ءار وتباسى باسىلىمنىڭ ۇيگە كەلۋىن اي سايىن اسىعا كۇتەدى دەسەك اسىرىپ ايتقاندىق ەمەس. ءىرى قالالاردان باستاپ الىس اۋىلدارداعى وقىرماندارعا دەيىن كوكەيىندەگى ويىن، جۇرەگىندەگى سىرىن وسى گازەت ارقىلى ءبولىسۋدى ءجون كورەدى. بۇعان گازەت رەداكسياسىنا لەك-لەگىمەن كەلىپ جاتقان وقىرمان حاتتارى دا دالەل.

25 جىلدىق مەرەيتوي قارساڭىندا گازەت رەداكسياسى «اق بوساعا» – 25*25» اكسياسىن ۇيىمداستىرۋدا. بۇل شارا اياسىندا 25 جىلعى تۇراقتى وقىرمان، گازەت جايلى 25 ەڭ ۇزدىك وي-پىكىر، «اق بوساعانىڭ» وقىرماندار ومىرىنە تيگىزگەن 25 پايداسى، گازەتتىڭ ەڭ تارتىمدى 25 سانى، ەڭ بەلسەندى 25 وقىرمان، گازەتپەن تۇيدەي قۇرداس 25  جاسار وقىرمان (جەكە كۋالىك جانە كەلەر جىلعا جازىلۋ تۇبىرتەگىنىڭ كوشىرمەسى بويىنشا) انىقتالادى. اتالمىش شارا قورىتىندىسى بويىنشا انىقتالعان جەڭىمپازدار ەسىمى گازەتتىڭ مەرەيتويلىق نومىرىندە جاريالانادى. ايەلدەردىڭ اقىلشىسى، ارۋلاردىڭ سىرلاسى، قازاق وتباسىنىڭ پىكىرلەسىنە اينالعان «اقبوساعا» گازەتىنىڭ ۇجىمىن الداعى مەرەيتويىمەن قۇتتىقتاپ، جەمىستى ەڭبەك پەن شىعارماشىلىق ورلەۋ تىلەيمىز.