تاجىكستان باسشىسى ەمومالي راحمونعا «ۇلت كوشباسشىسى» اتاعى رەسمي تۇردە، ارنايى زاڭمەن بەرىلىپ وتىر، - دەپ حابارلايدى «قامشى» پورتالى تاجىك اقپارات قۇرالدارىنا سىلتەمە جاساپ.
«ۇلت كوشباسشىسى» دەگەن اتاق ەمەس، ول – قازىرگى پرەزيدەنت ەمومالي راحمون پرەزيدەنتتىك ۋاكىلدىگىن اياقتاعاننان كەيىن الاتىن لاۋازىمى»، – دەپ تۇسىندىرەدى زاڭ جوباسىن ازىرلەۋشىلەر.
مۇنى رەسپۋبليكانىڭ وليي كەڭەسى، ياعني ءمادجليسى بەكىتىپ بەردى. ەندى ماجىلىستە قارالىپ، قابىلدانعان «بەيبىتشىلىك پەن ۇلتتىق بىرلىكتىڭ نەگىز قالاۋشى – ۇلت كوشباسشىسى تۋرالى» زاڭ ەمومالي راحمونعا ەلدىڭ پرەزيدەنتى ۋاكىلدىگىن توقتاتقاننان كەيىن دە رەسپۋبليكانىڭ ىشكى جانە سىرتقى ساياساتىن قالىپتاستىرۋداعى جەتەكشى رول اتقاراتىن ەڭ ىقپالدى ادام بولىپ قالا بەرۋىنە مۇمكىندىك دەرەدى.
جاڭا زاڭعا داۋىس بەرەر الدىندا وليي مادجليس سپيكەرى شۋكۋردجون زۋحۋروۆ قازىرگى پرەزيدەنتتى ناسيحاتتاپ جاتۋدىڭ ءوزى ارتىق ەكەنىن، ونىڭ ەلدىڭ، ونىڭ حالقىنىڭ ۇلتتىق مۇددەلەرىن قورعاۋشى جانە قۇدايدىڭ ءوزى كوشباسشى، جەتەكشى ەتىپ جاراتقان ادام بولىپ تابىلاتىنىن ايتتى. سوڭىنان اتالعان زاڭ ءبىر اۋىزدان قابىلداندى.
ەمومالي راحمون تاجىكستان بيلىگىنىڭ باسىندا 1990 جىلدان بەرى كەلەدى. ونىڭ ءتورتىنشى پرەزيدەنتتىك كەزەڭى 2013 جىلى باستالدى. راحمون بۇل جولى جەتى جىلعا سايلانعان. ءبىراق، كونستيتۋسياعا ساي، ول الداعى سايلاۋلارعا قاتىسا المايدى.
ەمومالي راحمون كەلەسى سايلاۋعا تۇسپەي، كەتىپ قالعان كۇندە دە جوعارىدا ايتىلعان ارتىقشىلىقتارعا يە بولىپ قالا بەرەدى. ول ەندىگى پرەزيدەنتتەن دە جوعارى تۇراتىن ادام بولادى. «ۇلت كوشباسشىسىنىڭ» حالىققا ۇندەۋ ارناۋعا، ولاردىڭ الدارىنا كەلىپ سويلەپ تۇرۋعا، ماڭىزدى مەملەكەتتىك ءىس-شارالارعا قاتىسىپ، سولاردا سويلەۋگە قۇقىعى بار.
زاڭعا سايكەس، بارلىق مەملەكەتتىك قۇرىلىمدار ءۇشىن «ۇلت كوشباسشىسىنىڭ» ۇسىنىستارىن ورىندار وتىرۋعا ءتيىس بولادى. ليدەر سونداي-اق ولارمەن كەلىسە وتىرىپ، «ىشكى ماڭىزدى ساياسي جاعدايلار مەن شەتەلدەگى پروبلەمالاردى شەشۋگا قاتىسا الادى».
ەلدى باسقارعان بارلىق جىلدارىندا كوشباسشىعا ەشكىمنىڭ تيە الماۋ قورعانىشى ساقتالىپ قالادى. ونى سول سياقتى ۇستاۋعا، قاماۋعا، تىنتۋگە بولمايدى. مۇنداي تارتىپتەر مۇلىكتەرى مەن تۋعان-تۋىستارى تاراپىنا دا قاراستىرىلادى.
ەستەرىڭىزگە سالساق، ە. راحموننىڭ قازاقستاندىق ارىپتەسى نۇرسۇلتان نازاربايەۆقا 2010 جىلدىڭ ماۋسىم ايىندا ارنايى زاڭمەن «ەلباسى – ۇلت كوشباسشىسى» اتاعى بەرىلگەن بولاتىن.
