الماتىدا كسرو-نى قايتا جاڭعىرتۋعا شاقىرعان «زا سسسر!» گازەتى تەگىن تاراتىلۋدا. بۇل تۋرالى جۋرناليست توقتار جاقاش ءوزىنىڭ فەيسبۋك الەۋمەتتىك جەلىسىندەگى پاراقشاسىندا دابىل قاقتى.

ءجۋرناليستىڭ ايتۋىنشا، ماسكەۋدە جارىق كورگەن، ا 2 فورماتىنداعى گازەتتى بەلگىسىز بىرەۋلەر ءرىسقۇلوۆ-سۇيىنباي داڭعىلدارىنىڭ قيىلىسىندا تەگىن تاراتقان. گازەت «وقىرماندارىن» بىرنەشە ۇلتتىڭ «ءتاتۋ-تاتتى كۇن كەشكەن، قايعىسىز-قامسىز» مەملەكەت كەڭەس وداعىن قايتا جاڭعىرتۋعا شاقىرادى.

«دابىل! اقپاراتتىق ءقاۋىپ ءتوندى! «سسسر-دى» اڭساۋ اسقىنىپ بارا جاتىر. ماسكەۋدە شىعاتىن مىنا كازيت الماتىدا تەگىن تاراتىلۋدا. ماتەريالدارى مەن ۇرانى - قازاقستان رەسپۋبليكاسىنىڭ كونستيتۋسيالىق قۇرىلىمىن تالقانداۋ، ەلدىڭ ەگەمەندىگىنە قول سۇعۋ. قازاقستان رەسپۋبليكاسىنىڭ زاڭدى جولمەن سايلانعان باسشىلارىن، ۇكىمەتىن، دەپۋتاتتارىن، اسكەري قۇرىلىمدارىن جويىپ، بوداندىق قامىتتى قايتا كيگىزۋدى كوزدەگەن. وزدەرىنىڭ جازۋىنشا - "باعىنا قويماعان سسسر ازاماتتارىنىڭ ورگانى" ەكەن! قىرىم مەن ۋكراينا، ورتا ازياداعى تۋىستاس مەملەكەتتەردى بىزگە قارسى قوياتىن ماقالاردى ۇيىپ-توگىپتى. بۇعان جول بەرمەۋ كەرەك! وسى ماسەلە بويىنشاالماتى قالاسىنىڭ اكىمدىگى، الماتى پوليسياسى تەرگەۋ-تەكسەرۋ امالدارىن جۇرگىزىپ، راديكالدى-ەكسترەميستىك باسىلىمعا قارسى قازاقستان رەسپۋبليكاسى قىلمىستىق جانە اكىمشىلىك كودەكستەرىنىڭ ەڭ قاتال تالاپتارى بويىنشا شارا قولدانادى دەپ ۇمىتتەنەمىن»، - دەيدى توقتار جاقاش ءوز جازباسىندا.

اتالعان وقيعاعا بايلانىستى الماتى قالاسىنداعى ءتيىستى مەملەكەتتىك مەكەمەلەردەن ازىرگە ەشبىر رەسمي مالىمدەمە تارامادى.