اۋىر اتلەتيكادان 2014 جىلعى الەم چەمپيونى ءارى 2015 جىلعى قولا جۇلدەگەر جاسۇلان قىدىربايەۆ دوپينگ ءۇشىن ءومىر بويىنا ديسكۆاليفيكاسياعا ۇشىراۋى مۇمكىن، - دەپ حابارلايدى «قامشى» پورتالى Vesti.kz – كە سىلتەمە جاساپ. 

سونىمەن قاتار، بۇگىن، 24 جەلتوقساندا حالىقارالىق اۋىر اتلەتيكا فەدەراسياسىنىڭ (IWF) قازاقستاندىق تاعى ەكى اۋىراتلەت الماس وتەشوۆ پەن ەرمەك ءومىرتايدى دوپينگ قولداندى دەگەن كۇدىك تۋعانى ءۇشىن ۋاقىتشا شەتتەتكەنى بەلگىلى بولدى. مالىمدەمەدە قازاقستاندىقتاردىڭ دوپينگ-سىناعىندا تىيىم سالىنعان زاتتاردىڭ انىقتالعانى جازىلعان. فەدەراسيا جالپى 17 سپورتشىنى ۋاقىتشا شەتتەتىپ وتىر. "قارا تىزىمگە" ىلىنگەندەردىڭ قاتارىندا قازاقستاننىڭ، رەسەيدىڭ، ءازىربايجاننىڭ، بەلارۋستىڭ، گرەكيانىڭ، مولدوۆانىڭ جانە سولتۇستىك كورەيانىڭ وكىلدەرى بار. 

ەگەر قىدىربايەۆ تىيىم سالىنعان زاتتى قاساقانا قولداندى دەگەن نۇسقا دالەلدەنسە ەكىنشى مارتە ەسكەرتۋ العاندىقتان ول ۇزاق مەرزىمگە، ءتىپتى ءومىر بويىنا ديسكۆاليفيكاسياعا ۇشىراۋى مۇمكىن. ال ەگەر شتانگاشى اعزاسىنا زاتتىڭ كەزدەيسوق ءتۇسىپ كەتكەنىن دالەلدەي السا ديسكۆاليفيكاسيا الىپ تاستالادى.  

باسىلىمنىڭ مالىمەتىنشە، 2013 جىلدىڭ قاڭتار ايىندا حالىقارالىق اۋىر اتلەتيكا فەدەراسياسىنىڭ مۇشەلەرى ميانمادا وتكەن ازيا جاستار بىرىنشىلىگىندە باس جۇلدەنى جەڭىپ العان قىدىربايەۆتىڭ قانىندا دوپينگ تاۋىپ، ەكى جىلعا ديسكۆاليفيكاسياعا ۇشىراعانىن حابارلاعان بولاتىن. ديسكۆاليفيكاسيانىڭ مەرزىمى 2014 جىلدىڭ 11 قاراشاسىندا اياقتالدى. ال ءتورت كۇن وتكەننەن كەيىن ول الماتىدا الەم چەمپيوناتىن جەڭىپ الدى.

ەسكە سالايىق قازاقستاندىق شتانگاشىلار الماس وتەشوۆ، جاسۇلان قىدىربايەۆ جانە ەرمەك ءومىرتاي 20-29 قاراشادا حيۋستوندا وتكەن الەم چەمپيوناتىنا قاتىسقان ەدى. 94 كەلىگە دەيىنگى سالماق دارەجەسىندە وتەشوۆ كۇمىس مەدال، وسى سالماقتا قىدىربايەۆ قولا جۇلدە العان بولاتىن. ال ەرمەك ءومىرتاي مەدالعا ىلىگە الماعان ەدى.