جالاڭ قولمەن قاسقىر الاتىن اڭشى ەرجان قاسىمبەكوۆ شىعىس قازاقستان وبلىستىق "ديدار" گازەتىنە بەرگەن سۇحباتىندا ءوزى جايىندا ايتىپ بەردى.
باسىلىمنىڭ مالىمەتىنشە، اۋىلداستارى ونى قاسقىر ەرجان دەپ اتاپ كەتكەن. ءتورت تۇلىگىن ورگىزىپ، اتاكاسىپتى جالعاستىرىپ كەلە جاتقان ەرجان ءتۇز تاعىسىنىڭ ءتىسى مالعا باتسا بولدى، ونى الماي قويمايدى. ول قاسقىردى تەحنيكامەن قۋىپ ءجۇرىپ، سنايپەرمەن اتىپ المايدى، كادىمگى ءداستۇرلى ادىسپەن سوعىپ الادى نەمەسە يت سالىپ اۋلايدى.
"تارباعاتاي اۋدانى، ۇشتوبە اۋىلىنىڭ تۇرعىنى ەرجان قاسىمبەكوۆ بالا كەزدەن اكەسىنە ەرىپ وكپەتى، دولانقارا، جەلدىقارا، قىزىلتاس تاۋلارىن كەزىپ وسكەن. اكەسى جۇماعازى اڭعا شىعىپ، يت جۇگىرتكەنىن كورىپ ەرجەتكەن ەرجان سەگىزىنشى سىنىپتا وقىپ جۇرگەندە ءبىرىنشى رەت قاسقىر العان. سودان بەرى بۇگىنگە دەيىن اۋلاعان تاعىلارىندا ەسەپ جوق"، - دەلىنگەن جاريالانىمدا.
ول اتا-باباسىنىڭ ءىزى قالعان قاراجال قىستاعىندا باعىپ وتىرعان مالىن قاسقىرعا تارتقىزباۋدىڭ امالىن ويلاپ قىستى وتكىزەدى. جىلدا - وسى. جاز جايلاۋعا تۇسكەنشە، ەكى كوزى ءتورت بولىپ ورماننىڭ سۇر جەندەتتەرىن اڭديدى. ءتىپتى، اۋىلدان ۇزاپ كەتكەن قاسقىردىڭ سوڭىنا ءتۇسىپ، كۇن ءجۇرىپ، ءتۇن ءجۇرىپ، الماي تىنبايدى. كوزىنە تۇسكەن قاسقىردى جىبەرمەي، ناعىز ءداستۇرلى اڭشىلارعا ساي ءتاسىلدى قولداناتىندىقتان بولسا كەرەك، اۋىلداستارى قاسقىر ەرجان دەپ تانيدى. ال ۇلدارى وزدەرىن "قاسقىردىڭ بولتىرىكتەرىمىز" دەيتىن كورىنەدى. باسىلىمنىڭ مالىمەتىنشە، ەرجاننىڭ ۇلكەن ۇلى ەرسايىن دا اڭشىلىق دەسە دەلەبەسى قوزىپ تۇرادى. سونىمەن قاتار، وتباسىندا ەگىز ۇلدارى رۇستەم مەن داستان بار.
ەرجاننىڭ ءىنىسى مەرەي قارتوۆتىڭ ايتۋىنشا، بىردە ەرجان اپانىنىڭ اۋزىندا اقىرىپ تۇرعان ايۋمەن بەتپە-بەت كەلىپ قالادى. ابىروي بولعاندا، جالما-جان يىعىنداعى مىلتىقتى وقتاپ جىبەرىپ، شۇرىپپەنى باسىپ ۇلگىرەدى. قورعاسىن وق تارپا باس سالعالى تۇرعان ايۋدىڭ كەۋدە تۇسىنا ءتيىپ، ول ەرجاننىڭ ۇستىنە قۇلاعان ەكەن.
ەستەرىڭىزگە سالساق، بۇعان دەيىن اڭشى ەرجان جايلى سايتىمىزدا ۆيدەو جاريالانعان ەدى. ول ۆيدەو الەۋمەتتىك جەلىدە قىزۋ تالقىلانىپ، قولدانۋشىلار اڭشىنىڭ باتىرلىعى مەن قايسارلىعىنا ءتانتى بولدى، كوپتەگەن پىكىرلەر جازىپ، قىزۋ ءبولىستى.
