قىزىلوردا وبلىسىنىڭ اكىمى قىرىمبەك كوشەربايەۆ نەسيەنى دۇرىس پايدالانباۋشىلارعا كوڭىلى تولمايتىنىن ءبىلدىرىپ، ونداي نەسيە الۋشىلاردى جازالاۋ كەرەكتىگىن ايتتى، - دەپ حابارلايدى «قامشى» پورتالى.
سىر ءوڭىرىنىڭ باسشىسى استانادا وتكەن باسپا ءسوز ءماسليحاتىندا وبلىستاعى ەكونوميكالىق-الەۋمەتتىك دامۋ باعىتىندا اتقارىلعان جۇمىستاردىڭ قورىتىندىسىن جاريالادى. وبلىس اكىمى كەلەر جىلى كاسىپكەرلەرگە شاعىن جانە ورتا بيزنەستى دامىتۋ ءۇشىن بەرىلەتىن نەسيە تالاپتارىن كۇشەيتۋدى ۇسىندى. ونىڭ ايتۋىنشا، كاسىپكەرلەر بۇل قاراجاتتى ماقساتسىز جۇمسايتىن جاعدايلار دا كەزدەسەتىن كورىنەدى.
«2016 جىلى ءبىز قىزىلوردا وبلىسىندا شاعىن كاسىپكەرلىكتى قارجىلاندىرۋدى ءۇش ەسە ارتتىرعالى وتىرمىز. سونىمەن قاتار، نەسيە الۋشىلاردىڭ جاۋاپكەرشىلىگىن دە كۇشەيتۋ قاجەت. ول ءۇشىن جاۋاپسىز نەسيە الۋشىلاردىڭ ناقتى ءتىزىمى جاسالىپ، نەسيە بيۋرولارىنا وتكىزىلۋى كەرەك. بۇل ارقىلى ءبىز، قوي ساتىپ الۋ ءۇشىن 3 ميلليون تەڭگەگە دەيىنگى شاعىن نەسيە الىپ، ونى تۋىسىنىڭ تويىنا جۇمساعان ادام ەندى ءقايتىپ ەشقاشان نەسيە الا المايتىن جۇيەگە قول جەتكىزەمىز»، - دەپ مالىمدەدى وبلىس باسشىسى.
«جاۋاپسىز نەسيە الۋشىلاردى كوتەرمەلەۋگە بولمايدى. ال، ۇلتتىق قوردان بولىنگەن قاراجاتتى ۇقىپتى جۇمساپ، نەسيەسىن ۋاقىتىندا جاپقان كاسىپكەرلەر كەلەسى جولى ءۇش ميلليون ەمەس، بەس ميلليون تەڭگە نەسيە الاتىنداي مۇمكىندىك جاساساق ءادىل بولادى»، - دەگەندى قوسا ايتتى.
سونداي-اق، ول مەملەكەتتىك باعدارلامالارمەن ءبولىنىپ جاتقان نەسيەلەر ءىرى جاۋاپكەرشىلىگى شەكتەۋلى سەرىكتەستىكتەرگە عانا ەمەس، اياعىنان ەندى تۇرىپ جاتقان شاعىن كاسىپكەرلەر مەن شارۋا قوجالىقتارىنا دا جەتەتىندەي مۇمكىندىكتەر قاراستىرۋ كەرەكتىگىنە نازار اۋدارتتى.
