بۇگىندىككە قازاقستاندىق اۋىر اتلەتتەر جاسۇلان قىدىربايەۆ، الماس وتەشوۆ جانە ەرمەك ءومىرتايدىڭ دوپينگ داۋىنا ىلىگۋى الەۋمەتتىك جەلىدە قىزۋ تالقىلانىپ جاتىر. كوپشىلىكتىڭ ايتۋىنشا، اتالعان سپورتشىلاردى فەدەراسيا قازاق بولعاندارى ءۇشىن قاساقانا اياقتان شالىپ جاتىر. الايدا، كەيبىر ازاماتتار جۇرتشىلىقتىڭ بۇل ۋاجىمەن كەلىسپەيدى. ناقتىراق ايتساق، حالىقارالىق اۋىر اتلەتيكا فەدەراسياسى سپورتشىلاردى ۇلتىنا قاراپ سپورتتان شەتتەتىپ وتىرعان جوق.

ءۇش بىردەي سپورتشىمىزدىڭ دوپينگ داۋىنا ىلىگۋى، ارينە وكىنىشتى ءجايت. ويتكەنى، اتالعان سپورتشىلار ريو-دە-جانەيرو وليمپياداسىندا جۇلدەگە تالاساتىن بىردەن-بىر سپورتشىلارىمىز بولاتىن. وكىنىشكە وراي، حالىقارالىق اۋىر اتلەتيكا فەدەراسياسى ءۇش سپورتشىمىزدى دوپينگ پايدالاندى دەپ كۇدىكتەنىپ وتىر. الايدا، اۋىر اتلەتتەرىمىز وزدەرىنىڭ كىناسىز ەكەندىكتەرىن دالەلدەۋگە مۇمكىندىگى بار. ونىڭ ۇستىنە، اۋىر اتلەتيكادان قازاقستان قۇراماسىنىڭ باس باپكەرى الەكسەي ني بۇل دوپينگ-سىناقتاردىڭ قورىتىندىسىنا كۇمانمەن قاراپ وتىر.

– بۇل جىگىتتەر كەشەگى بالالار ەمەس، قىدىربايەۆ – الەم چەمپيونى، ال وتەشوۆ – الەم چەمپيوناتى مەن ازيا ويىندارىندا كۇمىس جۇلدەگەر بولدى. بۇل سپورتشىلاردىڭ دەڭگەيى جوعارى، ءبىز ولاردى حيۋستونداعى جارىسقا التىن مەن كۇمىس مەدالدار الادى دەپ دايىندادىق. سپورتشىلارىمىزدى دوپينگسىز جانە وسىنداي داۋسىز دايىنداۋعا ميىمىز جەتپەي مە سوندا؟ لوگيكا بولۋى كەرەك قوي. سوندا رازيموۆ پەن زايچيكوۆ نەگە ۇستالمادى؟ ءبىز ءبىر كوماندامىز، بىرگە دايىندالدىق، سوندىقتان سۇراق كوپ. ۇشتىككە كىرە الماعان قاتارداعى سپورتشىلار ۇستالدى دەسە ءبىر ءجون، ال بۇل جىگىتتەر مەدال الۋعا دايىن، بۇل - نونسەنس. باسشىلىقتىڭ نە شەشەتىنى 28 جەلتوقساندا بەلگىلى بولادى، – دەدى الەكسەي ني.

ءيا، بۇل داۋدىڭ قالاي اياقتالاتىنى الداعى ۋاقىتتا بەلگىلى بولادى. سوندىقتان دا وعان دەيىن باس باپكەر قول قۋسىرىپ قاراپ وتىرماۋ كەرەك دەيدى. ناقتىراق ايتساق، قازاقستان اۋىر اتلەتيكا فەدەراسياسى سپورتشىلاردىڭ كىناسىزدىگىن دالەلدەپ شىعۋى كەرەك. ايتپەسە، جاسۇلان قىدىربايەۆ پەن الماس وتەشوۆ ريودا وتەتىن وليمپيادا ويىندارىنا بارا الماي قالادى. بۇل ولاردى  قازاقتان شىققان وليمپيادا چەمپيونى بولۋ باقىتىنان ايىرادى.

مىنە، وسىعان وكىنگەن ازاماتتار «ءۇش سپورتشىنى قازاق بولعاننان كەيىن اياقتان شالىپ وتىر» دەپ الەۋمەتتىك جەلىدە جازىپ جاتىر. الايدا، ەكىنشى تاراپ «حالىقارالىق اۋىر اتلەتيكا فەدەراسياسى سپورتشىلاردىڭ ۇلتىنا قاراپ شەكتەۋ جاسامايدى» دەگەن پىكىردە. سولاردىڭ ءبىرى «الامان» ۇلتتىق سپورت پورتالىنىڭ رەداكتورى،  بەلگىلى سپورت ءجۋرناليسى رۋسلان مەدەلبەك. ونىڭ ايتۋىنشا، فەدەراسيا ءۇشىن قازاق پەن ورىستىڭ نەمەسە كورەيدىڭ دوپينگ داۋىنا ىلىگۋى ماڭىزدى ەمەس.

– ازىرگە الماس وتەشوۆ، جاسۇلان قىدىربايەۆ، ەرمەك ءومىرتاي دوپينگ قولدانۋى مۇمكىن دەگەن كۇدىككە ءىلىنىپ وتىر. فەدەراسيا ءالى ناقتى شەشىم شىعارعان جوق. ال، ناقتى شەشىم ەكىنشى رەت اناليز تاپسىرعان سوڭ 6 ايدان كەيىن شىعۋى مۇمكىن. بۇل ارادا قازاقتى اياقتان شالۋ سياقتى ەشقانداي قۇيتىرقى ساياسات جوق. يا، سپورتشىلارىمىز كۇدىككە ءىلىندى. الايدا، اۋىر اتلەتتەرىمىزدىڭ دوپينگ قولدانباعانىن وسى سالاعا جاۋاپتى مادەنيەت جانە سپورت  مينيسترلىگى دالەلدەۋى كەرەك. ەگەر ولار ەكىنشى اناليزدەن تازا شىقپاسا، سپورتشىلارىمىز سپورتتان كەتەدى. ال، ول كەزدە مينيسترلىكتىڭ قولىنان تەك اۋىر اتلەتتەردىڭ سپورتتان كەتۋ ۋاقىتىن قىسقارتۋ عانا قالادى. ماسەلەن، ولارعا بەرىلەتىن جازا 2 جىل ەمەس، 9 نەمەسە 6 ايعا قىسقارادى، – دەيدى رۋسلان مەدەلبەك.

ءيا، ەندىگى ءۇمىت مادەنيەت جانە سپورت مينيسترلىگى مەن قازاقستان اۋىر اتلەتيكا فەدەراسياسىنىڭ جۇمىسىنا بايلانىستى بولىپ وتىر. ەگەر ولار بەلسەندى جۇمىس جاساپ، اۋىر اتلەتتەردىڭ كىناسىزدىگىن دالەلدەي السا، اتالعان ازاماتتار ريو-دە-جانەيرو وليمپياداسىنا بارادى. ال ەگەر شىنىمەن سپورتشىلارىمىز كىنالى بولىپ شىقسا، وكىنىشتەن وزەگىمىز ورتەنگەننەن باسقا امال جوق. سەبەبى، اۋىر اتلەتيكادان قازاقتان شىققان تۇڭعىش وليمپيادا چەمپيونىن كورۋ مۇمكىندىگى بىرنەشە جىلعا شەگەرىلەدى.

سەرىك جولداسباي

استانا