ەلباسى نۇرسۇلتان نازاربايەۆ قورعانىس مينيسترلىگىنىڭ باسشىلىعىمەن كەزدەستى. بۇل تۋرالىاقوردانىڭ باسپا ءسوز قىزمەتىنەن حابارلادى.

ءىس-شاراعا پرەزيدەنت اكىمشىلىگىنىڭ باسشىسى ن.نىعماتۋلين، پرەزيدەنتتىڭ كومەكشىسى - قاۋىپسىزدىك كەڭەسىنىڭ حاتشىسى ن.ەرمەكبايەۆ قاتىستى.

كەڭەس بارىسىندا ەلدىڭ قورعانىس قابىلەتىن جانە اسكەرلەردىڭ جاۋىنگەرلىك دايىندىعىن ارتتىرۋ جونىندەگى قارۋلى كۇشتەر قىزمەتىنىڭ 2015 جىلعى قورىتىندىلارى تالقىلاندى.

قازاقستان پرەزيدەنتى الەمدىك ەكونوميكا مەن حالىقارالىق ساياساتتاعى قيىندىقتارعا قاراماستان ەلىمىزدىڭ تۇراقتى دامىعانىن، داعدارىسقا قارسى ءتيىستى ستراتەگياسىن ازىرلەگەنىن جانە بيىلعى جىلدى وڭ كورسەتكىشتەرمەن اياقتاپ وتىرعانىن اتاپ ءوتتى.

مەملەكەت باسشىسى «نۇرلى جول»، يندۋستريالىق-يننوۆاسيالىق دامۋ باعدارلامالارى مەن بەس ينستيتۋسيونالدىق رەفورمانىڭ كەزەڭ-كەزەڭىمەن جۇزەگە اسىرىلىپ جاتقانىن ايتتى. قازاقستان پرەزيدەنتى بۇل ورايداعى قادامدار العا قويىلعان اۋقىمدى مىندەتتەردى بەلسەندى تۇردە ءارى ناتيجەلى جۇزەگە اسىرۋدى قاجەت ەتەتىنىنە توقتالدى.

نۇرسۇلتان نازاربايەۆ ارميانىڭ قازىرگى زامانعى اسكەري جانە تەررورلىق قاتەرلەردىڭ الدىن الۋ مەن بولدىرماۋداعى ماڭىزدى ءرولىن اتاپ ءوتتى.

ءاربىر قازاقستاندىق ءوز قاۋىپسىزدىگى تۋرالى ويلاي وتىرىپ، ەڭ الدىمەن قارۋلى كۇشتەرىمىزگە ءۇمىت ارتادى. سوندىقتان ەشقايسىڭىز مۇنى ۇمىتپاۋلارىڭ كەرەك. سىزدەر وزدەرىڭىز ءاردايىم ءتاس-تۇيىن دايىن جانە بەس قارۋلارىڭىز دا ساي بولعانى ءجون. مەملەكەت ءوز تاراپىنان ارمياعا قاجەتتى بارلىق جاعدايدى جاساۋعا ءتيىس. سىزدەردىڭ مىندەتتەرىڭىز - وفيسەرلەر مەن ساربازداردى تاربيەلەۋ جانە ساپالى دەڭگەيدە دايارلاۋ، - دەدى مەملەكەت باسشىسى.

سونىمەن قاتار جوعارعى باس قولباسشى قارۋلى كۇشتەردىڭ اسكەري قىزمەتشىلەرى قارۋلى قاقتىعىستاردىڭ جاڭا ۇردىستەرى مەن ەرەكشەلىكتەرىن ەسكەرۋ كەرەكتىگىن، كاسىبي، جاۋىنگەرلىك جانە مورالدىق-پسيحولوگيالىق دايارلىق دەڭگەيىن ۇدايى ارتتىرىپ وتىرۋعا تيىستىگىن ايتتى.

ءىس-شارا سوڭىندا مەملەكەت باسشىسى قارۋلى كۇشتەردى 2016 جىلعى دامىتۋعا بايلانىستى ءبىرقاتار مىندەت قويدى جانە وفيسەرلەردى الداعى مەرەكەمەن قۇتتىقتاپ، باسشىلىق قۇرامعا جاڭا قىزمەتتىك كولىك كىلتتەرىن تاپسىردى. 

استانا