«قازاقستاندا جاڭا جىلدى مەرەكەلەۋگە دەسترۋكتيۆتى ءدىني اعىمداردى ۇستانۋشىلار اشىق قارسىلىق بىلدىرۋدە»، - دەپ مالىمدەدى ق ر مادەنيەت جانە سپورت مينيسترلىگى ءدىن ىستەرى كوميتەتىنىڭ ءتوراعاسى عالىم شويكين.
«بۇل ماسەلەنى ءسوز ەتكەندە ەڭ الدىمەن مەرەكەنىڭ ەشبىر ءدىني مەيرام ەمەس ەكەنىنە نازار اۋدارۋ كەرەك. قازاقستاندا ەشكىم، ەشقانداي ءدىني ۇيىم بۇل مەرەكەنى ءدىني مەرەكە رەتىندە اتاپ وتپەيدى جانە بۇل كۇنى ەشكىمگە قۇلشىلىق جاسامايدى، ەشقانداي ءدىني راسىمدەر وتەلمەيدى. ياعني، دىنگە قاتىسى جوق. بۇل – روجدەستۆو مەرەكەسى ەمەس» دەگەن ءدىن ىستەرى كوميتەتىنىڭ باسشىسى جاڭا جىل مەرەكەسىن اتاپ وتپەۋگە شاقىرۋ كوبىنەسە راديكالدى ۇستانىمداعى ءدىندارلاردىڭ باستاماسى ەكەنىن ايتادى.
ونىڭ ايتۋىنشا، ءدىني مەرەكە روجدەستۆو جاڭا جىلدان بولەك اتالىپ وتەتىندىكتەن، بۇل جەردە ەشقانداي ءدىني الاۋىزدىق تۋعىزۋدىڭ قاجەتى جوق.
«ول (جاڭا جىل – رەد.) الەمنىڭ كوپ ەلدەرىندە دىنىنە، ۇلتىنا قاراماي مەرەكەلەنەدى. ەگەر مەيرام جۇرتقا، بالالارعا قۋانىش اكەلسە، وسى مەيرام ارقىلى وتباسىلىق جىلى قارىم-قاتىناستار نىعايسا، اق تىلەكتەر ايتىلسا، وسى مەيرام كەزىندە قايىرىمدىلىق شارالارى، باسقا دا يگى جۇمىستار جۇرگىزىلىپ جاتسا، جاڭا جىلدى نەگە اتاپ وتپەسكە؟» دەيدى عالىم شويكين مىرزا.
ءدىن ىستەرى كوميتەتىنىڭ جەتەكشىسى كەي ءدىن وكىلدەرىنىڭ بۇل نارازىلىعىن ولاردىڭ بارلىق مەرەكە اتاۋلىعا قارسىلىق بىلدىرەتىن، كەرتارتپا ارەكەتتەرىمەن بايلانىستىرادى.
«بۇل راديكالداردىڭ اينالاسىمەن ساناسپايتىندىعىنىڭ كەزەكتى ءبىر كورىنىسى. دەسترۋكتيۆتى اعىمدار زايىرلى ءىس-شارالارعا ۇنەمى قارسىلىق بىلدىرۋدە. ءتىپتى، ولار ناۋرىز مەيرامىن دا تاريحي تامىرى تەرەڭدە بولسا دا مەرەكەلەۋگە قارسى بولۋدا. مۇنداي اعىمدار يسلامداعى مەرەكەلەرگە دە قارسى. مۇسىلمانداردىڭ كوبى مۇحاممەت پايعامباردىڭ تۋعان كۇنى – ءماۋلىتتى مەرەكە رەتىندە اتاپ وتەدى. وسى مەرەكە كەزىندە دە مۇسىلمان جاماعاتىنىڭ اراسىنا جىك سالۋعا تىرىسادى»، - دەگەن قازاقستاننىڭ ەڭ الدىمەن زايىرلى مەملەكەت ەكەنىن نازاردا ۇستاۋعا شاقىرادى.
«ءبىزدىڭ ەلىمىزدىڭ ءوز تاريحى، ونىڭ ىشىندە يسلام دامۋىنداعى قازاقتاردىڭ ءوز قۇندىلىقتارى بار. ءبىزدىڭ ول داستۇرلەرىمىز قازاقتىعىمىزدىڭ باستى قۇراۋشىسى. ءبىز ءوز مادەنيەتىمىزدى، ءتىلىمىزدى، سالت-داستۇرلەرىمىزدى، ءتول تاريحي سانامىزدى قالىپتاستىرۋدامىز. بۇل ءبىزدى جاھانداسۋ داۋىرىندە بۇقارالىق مادەنيەتكە جۇتىلىپ كەتۋدەن ساقتايدى. راديكالداردىڭ شابۋىلدارى ءبىزدى وسى يمۋنيتەتتەن ايىرۋعا باعىتتالعان»، - دەگەن ع. شويكين قازاقستاندىقتاردى ءتۇرلى الاۋىزدىق تۋعىزاتىن اڭگىمەلەرگە ەرىپ كەتپەۋگە شاقىردى.
