بۇگىننەن باستاپ زەينەتاقى مەن جاردەماقى كولەمى وزگەرەدى. ياعني، ۇكىمەت وسى ساناتتاعى تولەمدى سايكەسىنشە 9-دان 32 پايىزعا دەيىن وسىرگەن ەدى. بۇدان بولەك اتالعان وزگەرىستەردىڭ مەملەكەتتىك قىزمەتشىلەر مەن شاكىرتاقى الاتىن ستۋدەنتتەرگە دە قاتىسى بار، - دەپ حابارلايدى 24.kz.

ابىشيەۆتەر وتباسى دارى-دارمەك پەن ازىق-تۇلىكتەن كوپ الادى. ويتكەنى بەرتىن كەلە وتاعاسى قالقامان سۇلەيمەن ۇلىنىڭ جۇرەگى سىر بەرە باستاعان. ال ءۇمىتجان اپايدىڭ ءوزى قان قىسىمى ءجيى كوتەرىلەتىنىن ايتادى. سوندىقتان قۇنى قىمبات بولسا دا، كورسەتكەن دارىلەردى ساتىپ الۋعا ءماجبۇر. بۇدان بولەك، كوممۋنالدىق تولەمدەر مەن باسقا دا كەرەك-جاراق تاعى بار. سوندىقتان زەينەتاقىنىڭ وسەتىنىن ەستىگەندە، بۇل وتباسى ەرەكشە قۋاندى.

ءۇمىتجان ابىشيەۆا، زەينەتكەر:

- بۇعان دەيىن 62 مىڭ تەڭگە الىپ كەلدىم. ەڭبەك ءوتىلىم - 37 جىل. وسىنى ەسكەرىپ، ەندى زەينەتاقىمدى 68 مىڭ تەڭگەگە كوتەردى. قوسىلعان اقشا كىشكەنتاي بولىپ كورىنگەنىمەن، ءبىز ءۇشىن بۇل – ۇلكەن كومەك. ءۇمىتجان اپاي سياقتى ەلىمىزدە 2 ميلليونعا جۋىق زەينەتكەر بار. ولاردىڭ بارلىعى دا ەندى زەينەتاقىنى 9 پايىزعا كوپ الادى. بۇدان بولەك نەگىزگى، ياعني، بازالىق تولەم كولەمى دە وزگەرتىلدى. ءقازىر ول – 11 مىڭ 965 تەڭگە. سايكەسىنشە، ەڭ تومەنگى زەينەتاقى ەندى 37 مىڭ 789 تەڭگەنى قۇرايدى.

جادىرا داۋلەتحانوۆا، ق ر دەنساۋلىق ساقتاۋ جانە الەۋمەتتىك دامۋ مينيسترلىگى باسقارماسىنىڭ جەتەكشىسى:

- مينيمالدى زەينەتاقى كولەمى 25 مىڭ 824 تەڭگەنى قۇراپ وتىر. بازالىق زەينەتاقى تولەمىمەن قوسا ەسەپتەگەندە، 37 مىڭ 789 تەڭگەنى قۇرايدى. سونىمەن قاتار مۇگەدەكتىگى بويىنشا جانە اسىراۋشىسىنان ايىرىلعانداردىڭ جاردەماقىلارى 7 پايىزعا ارتادى. بيىلدان باستاپ مۇمكىندىگى شەكتەۋلى جانە اسىراۋشىسىنان ايىرىلعان جاندار كولەمى ەسەلەنگەن جاردەماقى الادى. بۇعان قوسا، ءدال وسىنداي وزگەرىستەردىڭ دارىگەر، ءمۇعالىم جانە باسقا دا مەملەكەتتىك قىزمەتكەرلەرگە قاتىسى بار. ولاردىڭ ايلىعى ەڭبەك ءوتىلى مەن جۇمىس ناتيجەسىنە قاراي كوتەرىلىپ وتىرادى.

جابال ەرعالييەۆ، ق ر پارلامەنتى سەناتىنىڭ دەپۋتاتى:

- بولىپ جاتقان داعدارىستار كەزىندە دامىعان ەۋروپانىڭ ءوزى ازاماتتاردىڭ ەڭبەكاقىلارىن قىسقارتىپ جاتقاندا، قازاقستان جىل سايىن ءوسىرىپ كەلە جاتىر. ماسەلەن، 2016 جىلدىڭ وزىندە دارىگەرلەردىڭ، مۇعالىمدەردىڭ، «ب» توبىنداعى مەملەكەتتىك قىزمەتكەرلەردىڭ جالاقىلارى ورتاشا ەسەپپەن 30 پايىزعا وسەدى. بۇعان ەلباسى تولىق مۇمكىندىگىمىز بار ەكەندىگىن ايتتى. مامانداردىڭ ايتۋىنشا، بۇل باستامالار ەل ەكونوميكاسىنىڭ تۇراقتىلىعى مەن ونىڭ جىل ساناپ دامۋ دەڭگەيىن كورسەتەدى. ايتپاقشى، ءدال وسى قۋانىشتى جاڭالىقتىڭ ستۋدەنتتەرگە دە قاتىسى بار. بيىلدان باستاپ ولار شاكىرتاقىنى 25 پايىزعا ارتىق الادى.