بۇگىن ۇلتتىق ۇلان «وڭتۇستىك» وڭىرلىك قولباسشىلىعىنا قاراستى اسكەري بولىمدەردە 2016 جىلعى جاڭا وقۋ كەزەڭى باستالدى، - دەپ حابارلايدى «قامشى» پورتالى قولباسشىلىقتىڭ قوعاممەن بايلانىس جونىندەگى وفيسەرى ايدوس بايشاعىروۆقا سىلتەمە جاساپ.

«وقۋ كەزەڭىنىڭ اشىلۋىندا قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى - پرەزيدەنت نۇرسۇلتان نازاربايەۆتىڭ «جاھاندىق ءقاۋىپ پەن قارسىلىقتار جاعدايىنداعى ىشكى جانە سىرتقى ساياساتتاعى اۋقىمدى باعىتتار» تۋرالى ايتقان قاعيداسى مەملەكەتتىك-قۇقىقتىق دايىندىقتىڭ العاشقى تاقىرىبى رەتىندە تاڭدالدى» دەلىنگەن باسپا ءسوز قىزمەتى تاراتقان حابارلامادا.

قولباسشىلىق باسقارماسىنىڭ اسكەري قىزمەتشىلەرىمەن، سونداي-اق قولباسشىلىققا باعىنىشتى اسكەري بولىمدەردىڭ وفيسەرلەرىمەن، كەلىسىمشارت بويىنشا اسكەري قىزمەتشىلەرىمەن جانە ساربازدارمەن العاشقى ساباقتى ۇلتتىق ۇلان باس قولباسشىسىنىڭ تەحنيكا جانە قارۋ-جاراق جونىندەگى ورىنباسارى ساعاتبەك نۇراحمەتوۆ جۇرگىزدى. ساباق بارىسىندا ول ەلباسىمىزدىڭ بيىلعى ءداستۇرلى جولداۋىن كەڭ اۋقىمدا تالقىلاپ، مەملەكەتىمىزدىڭ 2015 جىلعى جەتكەن جەتىستىكتەرى مەن وتكىزىلگەن ايتۋلى ءىس-شارالارعا ەرەكشە توقتالىپ ءوتتى.

«ايتىپ وتسەك، قازاقستان حالقى اسسامبلەياسىنىڭ قۇرىلعانىنا – 20 جىل، ۇلى وتان سوعىسىنىڭ جەڭىسىنە – 70 جىل، اتا زاڭىمىزدىڭ قابىلدانعانىنا – 20 جىل، قازاق حاندىعىنىڭ قۇرىلعانىنا – 550 جىل، سەكىلدى مەملەكەت اۋقىمىندا وتكىزىلگەن ءىس-شارالاردىڭ ماڭىزدىلىعى زور» دەدى س. نۇراحمەتوۆ.

سونىمەن قاتار، وقۋ كەزەڭىنىڭ العاشقى كۇنى «وڭتۇستىك» وڭىرلىك قولباسشىلىعىنىڭ تاربيە جانە الەۋمەتتىك-قۇقىقتىق جۇمىستار باسقارماسىنىڭ باستىعى نيازتاي الكەشيەۆ وڭىرلىك قولباسشىلىق الدىندا تۇرعان مىندەتتەرگە توقتالدى. اسكەر ارداگەرى پولكوۆنيك ۆيكتور ماكولوۆ تا

ساردارلار مەن ساربازدارعا ۇلتتىق ۇلاننىڭ تاعىلىمدى تاريحىنان سىر شەرتىپ، ۇلتتىق پاتريوتتىق تاربيە تۋرالى ساباق وتكىزدى.

العاشقى مەملەكەتتىك-قۇقىقتىق ساباعى اياقتالىسىمەن ساپتىق الاڭدا ساپ تۇزەگەن ۇلاندىقتار قاۋىپسىزدىك شارالارى بويىنشا تاجىريبەلىك ساباقتارعا تاراستى.