الماتى قالاسىنىڭ مەدەۋ اۋدانىندا جىلۋ ماگيسترالىنىڭ ديامەترى 500 ميليمەترلىك قۇبىرى جارىلدى، - دەپ حابارلايدى «قامشى» پورتالى.
قالدىاياقوۆ پەن قازىبەك بي كوشەلەرىنىڭ قيىلىسىنداعى قۇبىر جەلىسى تۇسكى بىرلەر شاماسىندا جارىلعان. بۇل تۋرالى ۆيدەونى الەۋمەتتىك جەلىگە Nurs Noise ەسىمدى قولدانۋشى ورنالاستىرعان.
قۇبىردان اققان ىستىق سۋ كوشە بويىندا جانە ارىق ىشىمەن اعىپ جاتىر.
الماتى جىلۋ-ەنەرگەتيكا كەشەنىنىڭ وكىلى يان گيريننىڭ حابارلاۋىنشا، 1993 جىلى پايدالانۋعا بەرىلگەن قۇبىر، كونەرگەندىكتەن جارىلۋى مۇمكىن. اپات سالدارىنان ءبىر كوپ قاباتتى ءۇي مەن 6 اكىمشىلىك عيماراتى جىلۋ جەلىسىنەن اجىراتىلعان. ءقازىر قالپىنا كەلتىرۋ جۇمىستارى جۇرگىزىلۋدە.
