«ۇلتارالىق ارازدىقتى قوزدىردى» دەگەن ايىپپەن قاماۋعا الىنعان قوعام بەلسەندىلەرى ەرمەك نارىمبايەۆ پەن سەرىكجان مامبەتاليننىڭ ءىسى بويىنشا بۇگىنگى سوت وتىرىسىندا باستى كۋاگەردىڭ ءبىرى مۇرات تەليبەكوۆتەن جاۋاپ الىندى، - دەپ حابارلايدى ازاتتىق.

قوس ايىپتالۋشى مۇرات تەليبەكوۆتىڭ «ۆەتەر س ۋليسى» كىتابىنان ءۇزىندى جاريالاعانى ءۇشىن ءىستى بولىپ جاتقانى بەلگىلى. الايدا، ءوزىن قازاقستان مۇسىلماندار وداعىنىڭ ءتوراعاسى دەپ تانىستىراتىن م. تەليبەكوۆ عالامتوردا جاريالانعان كىتاپ نۇسقاسىنا ءوزىنىڭ قاتىسى جوقتىعىن مالىمدەدى.

سوتقا كىتاپتىڭ 1994 جىلى جاريالانعان نۇسقاسىن الىپ كەلگەن ول وسى نۇسقانى سوت ماتەريالدارىنا قوسۋدى سۇراعان.

ءبىراق، م. تەليبەكوۆ «اتالعان كىتاپتى 90-جىلدارى جازعانمەن، شىعارۋدىڭ ءساتى تۇسپەدى. ال، ونىڭ ينتەرنەتتە جاريالانعان نۇسقاسىنا مەنىڭ قاتىسىم جوق»، - دەگەن.

بۇگىن سونداي-اق، سوتتا lyakhov.kz سايتىنىڭ يەسى الەكساندر لياحوۆتان دا جاۋاپ الىندى. ايىپتالۋشى س. مامبەتالين اتالعان سايتتان قازان ايىندا م. تەليبەكوۆتىڭ «ۆەتەر س ۋليسى» كىتابىن تاۋىپ، ءۇزىندىسىن الەۋمەتتىك جەلىدە جاريالاعانىن ايتۋدا. الايدا، سايت يەسى سايتتا ول كىتاپتىڭ جوقتىعىن ايتىپ، قوسىمشا تۇسىنىك بەرگەن.

ونىڭ ايتۋىنشا، سايتتا اتالعان كىتاپ شامامەن 2002 جىلى جاريالانىپ، ەكى-ۇش جىل بۇرىن ءتۇرلى پىكىرلەر كوبەيگەن سوڭ سايتتان الىنىپ تاستالعان. الايدا، قىركۇيەك ايىندا، كىتاپ بەلگىسىز سەبەپتەرمەن  جانە ا. لياحوۆتىڭ ارالاسۋىنسىز سايتقا قايتا شىعىپ كەتەدى. سول ۋاقىتتا ماتەريال سايتتان تاعى دا وشىرىلەدى.

س. مامبەتالين سوت وتىرىسى بارىسىندا قازان ايىندا سايتتان اتالعان كىتاپتى وقىعانىن، قازاق حالقىنىڭ ار-نامىسىنا تيەتىن ءۇزىندىسىن سىنعا الىپ، فەيسبۋك جەلىسىنە جاريالاعانىن ايتتى. دالەل رەتىندە ۇقك ماماندارىنىڭ زەرتتەۋ قورىتىندىسى مەن سايت بەتىنىڭ اتالعان كىتاپ ءۇزىندىسى جاريالانعان سكرين-شوتىن كورسەتتى. الايدا، ا. لياحوۆ بۇعان پلەنكالى فوتواپپاراتقا تۇسىرىلگەن سۋرەتتەن باسقا، ەشقانداي سكرين-شوت مۇنداي جاعدايدا دالەل بولا المايتىنىن، سكرين-شوتتى قولدان جاساۋعا بولاتىنىن ايتىپ، قارسىلىق بىلدىرگەن.

ەستەرىڭىزگە سالساق، قوعام بەلسەندىلەرى ەرمەك نارىمبايەۆ پەن سەرىكجان مامبەتالين وتكەن جىلدىڭ قازان ايىنان بەرى «ۇلتارالىق ارازدىق تۋعىزدى» دەگەن ايىپپەن قاماۋدا وتىر. تەرگەۋ بارىسىندا جانە سوت وتىرىستارىندا ولار وزدەرىنە تاعىلعان ايىپتى مويىنداۋدان باس تارتۋدا.

ەسكەرتۋ: سۋرەتتەر ازاتتىق سايتىنان الىندى.