وڭتۇستىك قازاقستاندا مەملەكەتتىك كىرىس دەپارتامەنتىنىڭ ءۇش قىزمەتكەرى مۇناي ۇرلاۋمەن اينالىسقان قىلمىستىق توپ قۇردى دەگەن كۇدىككە ءىلىنىپ، ەكەۋى قاماۋعا الىندى، بىرەۋى قاشىپ كەتكەن - دەپ حابارلايدى «قامشى» پورتالى.

توپ مۇنايدى پاۆلودار-شىمكەنت مۇناي قۇبىرىنان ۇرلاپ كەلگەن. شىمكەنتتىڭ ءال-فارابي اۋداندىق سوتىنىڭ حابارلاۋىنشا كۇدىككە ىلىنگەندەردىڭ ىشىندە 36 جاستاعى مەملەكەتتىك كىرىس دەپارتامەنتىنىڭ اعا وفيسەرىنە ۇيىمداسقان قىلمىستىق توپ قۇرىپ، باسقاردى دەگەن ايىپ تاعىلۋدا.  بۇل ءۇشىن ول 13 جىلعا باس بوستاندىعىنان ايرىلۋى مۇمكىن.

«بۇل باپتاردىڭ ءبىرىنىڭ سانكسياسى 8-دەن 13 جىلعا دەيىن باس بوستاندىعىنان ايىرۋدى كوزدەيدى جانە اسا اۋىر قىلمىستار ساناتىنا جاتادى. ول قىلمىستىق توپ قۇردى جانە ونى باسقاردى دەپ ايىپتالۋدا. بۇل جاعدايدا ونى كەپىلزاتپەن بوساتۋ قاراستىرىلماعان»،- دەيدى كۇدىكتىلەردى تۇتقىنداۋعا سانكسيا بەرگەن سۋديا عاني بايارىستان.

تەرگەۋشىلەردىڭ ايتۋىنشا، وقو سوزاق اۋدانىندا مۇناي قۇبىرلارىنان قارا التىن ۇرلاۋشىلار ءىسىن زەرتتەۋگە ءتيىس بۇل وفيسەرلەر شىن مانىندە سول توپتىڭ زاڭسىز ارەكەتىنە باسشىلىق جاساپ كەلگەن.