الماتى وبلىسىنىڭ ەسكەلدى اۋدانىندا بەس وقۋشى قىز جۇكتى بولىپ قالىپ، انا بولۋعا دايىندالىپ جاتىر، - دەپ حابارلايدى «قامشى» پورتالى "31 ارنا"-عا سىلتەمە جاساپ.

وقۋشى قىزداردىڭ جۇكتىلىگى پروكۋرورلاردىڭ مەديسينالىق ەسەپتەردى تەكسەرۋىنەن كەيىن بەلگىلى بولعان. ءبىر ايتا كەتەرلىگى، ەسەپكە الىنعان "بولاشاق انالاردىڭ" باسىم بولىگى وگەي اكەلەرىنىڭ تاربيەسىن كورگەندەر ەكەن.

بۇل وبلىستا تىركەلگەن رەسمي دەرەكتەر. مۇنداي جاعدايلاردىڭ بىزگە بەلگىسىزى قانشاما؟ دارىگەرلەر ءوز كەزەگىندە ەرتە باستان جىنىستىق قاتىناسقا ءتۇسۋدىڭ سالدارى اۋىر بولاتىنىن ايتىپ وتىر - بۇل الدىن الۋ شارالارىن جۇرگىزبەگەن مەكتەپتىڭ جانە جاسوسپىرىمدەردى قاراۋسىز قالدىرىپ، جىنىستىق تاربيە بەرمەگەن اتا-انالاردىڭ كىناسى دەلىنەدى. 

ەسكەلدى اۋداندىق پروكۋرورلار تاعى دا ءبىر تاڭعالدىرارلىق ستاتيستيكانى جاريا ەتتى - كامەلەتكە تولماعانداردىڭ سەكسۋالدىق ماندەگى 10 اكتىسنىڭ بىرەۋى ءوزىنىڭ وگەي اكەسىمەن بولعان. 

"مۇنداي وتباسىلار ەرەكشە باقىلاۋعا الىندى. سونىمەن قاتار، پروكۋراتۋراداعىلار كامەلەتكە تولماعاندارمەن جىنىستىق قاتىناسقا ءتۇسۋدىڭ جاۋاپقا تارتىلاتىنى تۋرالى ايتىپ، ەسكەرتۋ جاسادى"، - دەپ حابارلايدى تەلەارنا.