ەرتەڭ، 3 ناۋرىز كۇنى ساعات 12.00-دە  الماتى قالاسىندا جاندوسوۆ پەن بايزاقوۆ كوشەلەرىنىڭ قيىلىسىنداعى رف-نىڭ باس كونسۋلدىعىنا جانە  استانا  قالاسىنداعى رەسەي ەلشىلىگىنىڭ الدىندا ساعات 13.00 دە ۇلت  جاناشىرلارى  جينالماقشى.  مۇنداي قادامعا پاتريوتتاردى  رەسەيدىڭ  ۋكرايناعا باسىپ كىرۋى، سوڭعى ۋاقىتتاعى رەسەيدىڭ ليمونوۆ، جيرينوۆسكيي  سەكىلدى "ۇردا-جىق" ساياساتكەرلەرىنىڭ  قازاقستانعا  كورسەتكەن قۇقايى يتەرمەلەپ  وتىرعان سەكىلدى. جۇرتتىڭ ايتۋىنشا، رەسەي كەشە ابحازيا مەن وسەتيا، بۇگىن قىرىم، ەرتەڭ سولتۇستىك قازاقستاندى باسىپ الۋى مۇمكىن.

شارا تۋرالى بەلگىلى  جۋرناليست قاسىم امانجول: "ەرتەڭ ءبىز ق ر كونستيتۋسياسى كەپىلدىك بەرگەن ازامات رەتىندەگى زاڭدى قۇقىمىزدى پايدالانامىز. رەسەي كونسۋلىنا بەيبىت تۇردە  نارازىلىعىمىزدى بىلدىرەمىز. ءار ەلدىڭ تاۋەلسىزدىگى مەن ازاتتىعىنا، شەكاراسىنا قول سۇعىلماۋىن سۇرايمىز. ءسىز بىزبەن بىرگەسىز بە، زامانداس؟"  دەپ  جازادى فب جەلىسىندە.

ال،  ساياساتتانۋشى ايدوس  سارىم: "ءبىر نارسەنى تۇسىنگەنىمىز ابزال: ەگەر رەسەي وزىنە جاقىن ۋكراين حالقىنا قارسى سوعىس اشۋعا دايىن تۇرسا، قازاقتى ەش ايامايتىنى انىق. بيلىك نە دەسە و دەسىن، ىشتەي سوعىسۋعا دايىندالا بەرەيىك"  دەي  كەلە، "كرەملدىڭ قىرىمداعى ۋكراينا اگرەسسياسىنا  پاتريوتتار ءوز نارازىلىقتارىن بىلدىرەدى. قازاقستاندىق ۋكرايندار دا ءوز ۇندەرىن  قوساتىن شىعار" -دەيدى.