شىمكەنتتە اعايىندى ەكى جىگىت ءبىرىنىڭ قايىن اتاسىن ۇرىپ ولتىرگەن. 52 جاستاعى تۇرعىننىڭ جانسىز دەنەسىن كورشىلەرى تاۋىپ العان، -دەپ حابارلايدى «قامشى» پورتالى وقو ءىىد-ى باسپا ءسوز قىزمەتىنە سىلتەمە جاساپ.

ءال-فارابي اۋداندىق ىشكى ىستەر باسقارماسىنىڭ قىزمەتكەرلەرى شۇعىل ىزدەستىرۋ شارالارىن جۇرگىزىپ ناتيجەسىندە وسى ىسكە قاتىسى بار دەگەن كۇدىكپەن مارقۇمنىڭ كۇيەۋ بالاسى مەن ونىڭ اعاسىن ۇستاعان. 1987 جانە 1989 جىلدارى تۋعان اعايىندى جىگىتتەر سول كۇنى تاڭەرتەڭ جابىرلەنۋشىنىڭ ۇيىنە، ياعني ۇلكەن اعاسىنىڭ قايىن اتاسىنا قوناققا بارعان. ىشىمدىك ءىشىپ العان جىگىتتەر سوزگە كەلىپ قالادى. ونىڭ سوڭى توبەلەسكە ۇلاسقان. ءدۇردارازدىق كەزىندە قىلقىندىرىپ، جەرگە قۇلاعان ازاماتتى ەكەۋى جابىلىپ اياۋسىز ۇرىپ-سوققان. اۋىر دەنە جاراقاتىن العان قالا تۇرعىنى ءوز ۇيىندە جان ءتاسىلىم ەتكەن.

كۇدىكتىلەر وقيعا ورنىنان ءىزىن جاسىرىپ ۇلگەرگەن. «قازىرگى تاڭدا اعايىندى جىگىتتەرگە قاتىستى قىلمىستىق ءىس قوزعالدى»، - دەيدى وقو ءىىد باسپا ءسوز ورتالىعىنداعىلار.